Дар Тоҷикистон ҷаласаи 37-уми пленарии Гурӯҳи Авруосиё доир мегардад

Ноябрь 2, 2022 10:03

ДУШАНБЕ, 02.11.2022 /АМИТ «Ховар»/. Дирӯз, 1 ноябр дар Бонки миллии Тоҷикистон ҷаласаи навбатии Комиссияи доимамалкунандаи байниидоравӣ оид ба муқовимат ба қонунигардонии даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли ом (МҚД/МТ/МПСҚО) доир гардид. Зимни он масъалаи баргузории ҷаласаи 37-уми пленарии Гурӯҳи Авруосиё дар Тоҷикистон, ки моҳи ноябри соли равон мегузарад, баррасӣ шуд. Дар ин бора ба АМИТ «Ховар» дар Бонки миллии Тоҷикистон хабар доданд.

Ҷаласа таҳти роҳбарии Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ Зариф Ализода (Раиси Комиссия), муовини Раиси Бонки миллии Тоҷикистон Алиҷон Салимзода бо иштироки намояндагони мақомоти дахлдори кишвар ва департаменти мониторинги молиявии назди Бонки миллии Тоҷикистон баргузор гардид.

Раиси Комиссия дар оғози нишаст оид ба масъалаҳои марбут ба таҳдидҳо, аз қабили терроризм, ифротгароӣ, қочоқи маводи мухаддир ва аслиҳа, даромадҳои бо роҳи ҷиноят бадастоварда, нооромиҳои вақтҳои охир дар ҷаҳон ва зиёд шудани дигар шаклҳои ҷинояткорӣ, ки ҷомеаи ҷаҳониро нигарон намудааст, сухан ронда, барои  пешгирӣ намудани ҳолатҳои номатлуб ва софдилона иҷро кардани вазифаҳо даъват намуд.

Дар идома зикр карда шуд, ки аз ҷониби вазорату идораҳои дахлдор бандҳои «Нақшаи Ҷумҳурии Тоҷикистон оид ба рафъи камбудиҳои мутобиқати техникӣ ва баланд бардоштани самаранокии низоми МҚД/МТ/МПСҚО» амалӣ шуда истодаанд.

Ализода Зариф иброз намуд, ки гарчанде аз ҷониби мақомоти марбутаи кишвар қисмате аз бандҳои нақшаи зикршуда иҷро шуда бошад ҳам, аммо вазорату идораҳои дахлдорро зарур аст ҷиҳати иҷрои пурраи бандҳои вобаста ба самти худ пайваста чораҷӯӣ намоянд. Ҳамзамон намояндаи Вазорати адлия мулоҳизаҳои худро дар мавриди корбарӣ бо ташкилоти ғайритиҷоратӣ дар доираи гурӯҳи кории байниидоравӣ ва корҳои иҷрошуда иброз намуд.

Сипас аз ҷониби намояндаи Департамент маълумот оид ба баргузории масъалаҳои марбутаи ҷаласаҳои Гурӯҳи Авруосиё оид ба муқовимат ба қонунигардонии даромадҳои бо роҳи ҷиноят бадастоварда (ГАО) ва натиҷаҳои бадастовардаи Ҷумҳурии Тоҷикистон дар ин самт манзур карда шуданд.

Роҳбари Комиссия дар баррасии масъалаҳо оид ба тадбирҳои тадорукотӣ-ташрифотӣ барои омодагӣ ба баргузории ҷаласаи 37-уми ГАО, ки аз 21 то 25 ноябри соли равон дар Ҷумҳурии Тоҷикистон ба нақша гирифта шудааст, аъзои Комиссия ва намояндагони вазорату идораҳои мутасаддиро барои дар сатҳи зарурӣ баргузор намудани чорабинӣ таъкид намуд.

Мавриди зикр аст, ки Комиссияи доимамалкунандаи байниидоравӣ оид ба муқовимат ба қонунигардонии (расмикунонии) даромадҳои бо роҳи ҷиноят бадастоварда, маблағгузории терроризм ва маблағгузории паҳнкунии силоҳи қатли ом (МҚД/МТ/МПСҚО) бо мақсади ҳамоҳангсозии фаъолияти мақомоти дахлдори давлатӣ дар татбиқи стандартҳои МҚД/МТ/МПСҚО аз ҳисоби намояндагони вазорату идораҳои дахлдор бо қарори Ҳукумати Ҷумҳурии Тоҷикистон аз 4 октябри соли 2013 таъсис дода шудааст.

АКС: Бонки миллии Тоҷикистон

Ноябрь 2, 2022 10:03

Хабарҳои дигари ин бахш

Ҷаласаи 21-уми Шурои ҳамоҳангсози байнидавлатии роҳбарони мақомоти назорати суғуртавии ИДМ доир шуд
Озмуни «Маҳсулот ва хизматрасонии беҳтарин дар Ҷумҳурии Тоҷикистон» ҷамъбаст мегардад
Таҳкими ҳамкории гумрукӣ дар ҷаласаи коршиносони Шурои роҳбарони хадамоти гумруки ИДМ баррасӣ гардид
Намояндаи Тоҷикистон дар Форуми иқтисодии Авруосиё 2025 иштирок намуд
Ҳамкории Институти масъалаҳои об, гидроэнергетика ва экологияи Тоҷикистон ва Донишгоҳи захираҳои табиӣ ва илмҳои амалии Австрия густариш меёбад
Барои истифодаи сарфакоронаи неруи барқ дар шаҳру навоҳии тобеи ҷумҳурӣ корҳои фаҳмондадиҳӣ мегузаронанд
Дар Боку Форуми байналмилалӣ доир ба рушди омор оғоз гардид
ҲАҶМИ ИСТЕҲСОЛИ ГӮШТ ДАР ТОҶИКИСТОН 10 ФОИЗ ЗИЁД ГАРДИД. Чаро нархи гӯшт дар бозори истеъмолӣ пайваста боло меравад?
Ҷаласаи нуздаҳуми Кумитаи ҳамоҳангсоз оид ба содагардонии расмиёти савдо баргузор гардид
Дар Тоҷикистон ба соҳаи сохтмон зиёда аз 16 миллиард сомонӣ сармоягузорӣ равона карда шудааст
Тоҷикистон ва Барномаи рушди СММ ҳамкориро дар самти муқовимат ба коррупсия густариш медиҳанд
Ҳоким Холиқзода бо Вазири меҳнат ва таъминоти иҷтимоии Ҷумҳурии Туркия Ведат Ишикхан мулоқот намуд