МУШКИЛОТ ВА ТАҲДИДҲОЕ, КИ АЗ АФҒОНИСТОН САР МЕЗАНАНД. Дар Душанбе бори аввал даври даҳуми «Муколамаи амнияти Ҳирот» доир мегардад

Ноябрь 30, 2022 11:45

ДУШАНБЕ, 30.11.2022 /АМИТ «Ховар»/. Вазъе, ки дар Афғонистон ба вуқӯъ пайвастааст, бахусус фаъолгардӣ ва афзоиши аъзои гурӯҳҳои террористӣ дар ин кишвар Тоҷикистонро нигарон кардааст. Дар ин бора муовини Вазири корҳои хориҷии Тоҷикистон Фарҳод Салим дар конфронси байналмилалии «Муколамаи амнияти Ҳирот», ки 29 ноябр дар Душанбе оғоз гардид, изҳор дошт. Конфронси мазкур ба мушкилот ва таҳдидҳое, ки аз ҷониби Афғонистони ҳамсоя сар мезананд, бахшида шудааст, хабар медиҳад АМИТ «Ховар».

«Ал-Қоида»*, «Давлати Исломӣ»*, «Ҷамоати Ансоруллоҳ»*, «Ҳаракати исломии Туркистони Шарқӣ»*, «Таҳрики Толибони Покистон»* ва дигар созмонҳои террористӣ дар Афғонистон намояндагии васеъ доранд», — гуфт муовини Вазири корҳои хориҷии Тоҷикистон.

Дипломати тоҷик ташаббуси Эмомалӣ Раҳмонро дар мавриди таъсиси камарбанди амниятӣ дар атрофи Афғонистон хеле муҳим шуморид, зеро он ба мубориза бо хатару таҳдидҳое, ки ба амнияти ҷумҳурӣ аз ҳудуди Афғонистон таҳдид мекунанд, ҳамчунин ҷиҳати рушди иҷтимоию иқтисодии ноҳияҳои сарҳадии ин кишвар равона гардидааст.

Фарҳод Салим ҳамчунин таъкид намуд, ки сарфи назар аз хатарҳои созмонҳои террористии зикршуда Тоҷикистон набояд ба сарнавишти мардуми Афғонистон бетафовут бошад. Ӯ зикр намуд, ки Тоҷикистон барои расонидани кумакҳои башардӯстона омодагӣ дида, имконоти моддию техникии худро тавассути сохторҳои гуногуни СММ ва аз номи Ҳукумати ҷумҳурӣ пешниҳод менамояд.

«Он пулҳое, ки тавассути дарёи Панҷ миёни Афғонистону Тоҷикистон вуҷуд доранд, имкон медиҳанд, ки кумакҳои башардӯстона ба аҳолии ин кишвар интиқол дода шаванд», — афзуд Фарҳод Салим. Ба гуфтаи ӯ, ба эътидол овардани сулҳ дар Афғонистон яке аз шартҳои аслии таъмини амният дар минтақа аст.

Дар конфронси «Муколамаи амнияти Ҳирот» дар Душанбе ҳудуди 120 нафар, аз ҷумла роҳбари Ҷабҳаи муқовимати миллии Афғонистон Аҳмад Масъуд ва намояндагони толибон ширкат доранд. Барнома 2 рӯз давом мекунад.

Ёдовар мешавем, ки конфронси кунунии Душанбе даври 10-уми музокирот аст. Даври аввали «Муколамаи амнияти Ҳирот» соли 2012 дар Ҳирот баргузор шуда буд ва давраҳои баъдӣ ҳамасола дар ҳамон ҷо баргузор мешуданд.

_________________

* Ташкилоти террористие, ки фаъолияташон дар Тоҷикистон мамнӯъ аст.

АКС аз манбаъои боз

Ноябрь 30, 2022 11:45

Хабарҳои дигари ин бахш

Дар Тоҷикистон шумораи нашъамандон нисбат ба солҳои қаблӣ коҳиш ёфт
Дар Душанбе маросими ҷоизасупорӣ ва ҳавасмандгардонии варзишгарони Вазорати мудофиа доир гардид
НИШАСТИ МАТБУОТӢ. Дар Тоҷикистон таъсири сардиҳо ба хоҷагии қишлоқ, маҳсулоти кишоварзӣ ва чорводорӣ бе асар намонд
Барои риоя накардани қоидаҳои бехатарии саноатӣ шахсони масъул беш аз 1 миллион сомонӣ ҷарима баста шуданд
Дар пойгоҳи Донишкадаи ҳарбӣ масъалаи рушди илми низомӣ баррасӣ карда шуд
БЕМАСЪУЛИЯТИИ ВОЛИДАЙН. Дар Душанбе давоми чор сол аз ноболиғону наврасон шумораи зиёди силоҳи сард мусодира гардид
Сарбозони шаҳри Бӯстон ҳамсолони худро ба ҳимояи марзҳои муқаддаси Ватан даъват намуданд
Дар Ҳисор озмуни «Ватанпарвар» доир карда мешавад
«МУҚОВИМАТ БА САВДОИ ОДАМОН: МУШКИЛОТ ВА МУЛОҲИЗАҲО». Дар Хоруғ таҳти ин унвон ҳамоиш доир шуд
ЭҲТИЁТ БОШЕД, ШАКЛИ НАВИ ДУЗДӢ! Дар Душанбе ҷавондухтареро барои тасарруфи маблағҳо аз ҳамёни электронӣ дастгир намуданд
Дар Хатлон барои наваскарон бурсҳои ройгон ташкил гардиданд
Дар роҳҳои мошингарди минтақаҳои кӯҳии Тоҷикистон хатари лағзиши тарма боқӣ мемонад