АЗ ПАЁМ ТО ПАЁМ. Дар Бадахшон сохтмони 17 пул бо арзиши лоиҳавии зиёда аз 20 млн доллар ба анҷом расонида шуд

Декабрь 19, 2022 10:54

ДУШАНБЕ, 19.12.2022 /АМИТ «Ховар»/. Дар Паёми соли гузашта ба Маҷлиси Олӣ Президенти мамлакат муҳтарам Эмомалӣ Раҳмон бори дигар таъкид намуданд, ки Ҳукумати кишвар бо истифода аз тамоми имкониятҳо ҷиҳати ҳалли масъалаҳои бунёду навсозии роҳҳо мунтазам чораҷӯӣ менамояд. Дар ин замина дар Вилояти Мухтори Кӯҳистони Бадахшон сохтмони 17 пул дар ноҳияҳои Дарвоз, Ванҷ, Рӯшон ва Мурғоб бо арзиши лоиҳавии зиёда аз 20 млн доллари ИМА аллакай ба анҷом расонида шуд, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии ВМКБ.

Тавре Вазири нақлиёти Ҷумҳурии Тоҷикистон Азим Иброҳим иброз намуд, дар давраи соҳибистиқлолӣ дар бахши роҳсозӣ, таҷдиду барқарорсозии роҳҳои мошингарди вилоят ҷиҳати баромадан аз бунбасти коммуникатсионӣ бо ҷалби лоиҳаҳои маблағгузорӣ як қатор корҳои муҳим ба анҷом расонида шуданд.

«Яке аз иншооти муҳиме, ки дар тараққиёти иқтисодию иҷтимоии вилоят саҳми назаррас дорад ва вилоятро аз бунбасти коммуникатсионӣ раҳоӣ бахшид, бо давлатҳои абарқудрати ҷаҳонӣ пайваст намуд, ин кушодашавии шоҳроҳи Душанбе –Кӯлоб-Қалъаихумб-Рӯшон-Хоруғ-Мурғоб-Қулма мебошад»- илова кард ў.

Вазири нақлиёт тазаккур дод, ки таҷдиди роҳи Шкев – Қалъаихумб ба анҷом расида, сохтмони қитъаи роҳ аз ноҳияи Дарвоз то сарҳади Рӯшон оғоз шуд ва корҳои лоиҳакашии роҳ аз Рӯшон то деҳаи Варшези ноҳияи Шуғнон идома доранд.

Азим Иброҳим иттилоъ дод, ки дар заминаи дастури Роҳбари давлат соли оянда сохтмони пули мошингузар дар маҳаллаи Селхозтехника ва долонҳои зидди тарма дар мавзеи Барсеми ноҳияи Шуғнон оғоз мегарданд.

Ёдовар мешавем, ки Саврвари давлат дар Паёми соли гузашта изҳор дошта буданд, ки дар соҳаи нақлиёт татбиқи 13 лоиҳаи сармоягузории давлатӣ ба маблағи умумии зиёда аз 11 миллиард сомонӣ идома дорад, ки барои ба кишвари дорои шароити муосири транзитӣ табдил ёфтани Тоҷикистон мусоидат мекунад.

Ҳамзамон Пешвои миллат иброз намуданд, ки дар панҷ соли оянда, яъне солҳои 2022–2026 боз сохтмону таҷдиди роҳҳои мошингарди Гулистон–Фархор, Ҷалолиддини Балхӣ–Қубодиён–Шаҳритус, Данғара–Гулистон–Кӯлоб, Рӯшон–Хоруғ–Кулма, Хуҷанд–Конибодом ва Хуҷанд–Ашт оғоз мегардад.

Дар давоми солҳои 2022–2026 зиёда аз 1000 километр роҳҳои мошингард, 53 пул, 7 нақб ва 5 долони зидди тарма бунёд карда мешаванд, ки қисми зиёди онҳо дорои сатҳи байналмилалӣ мебошанд.

София ШОИК,
АМИТ «Ховар»

АКС: АМИТ «Ховар»

Декабрь 19, 2022 10:54

Хабарҳои дигари ин бахш

Сарвари давлат Эмомалӣ Раҳмон аз вазъи барҳамхӯрӣ ва аз фаъолият мондани корхонаҳои саноатӣ дар вилояти Суғд изҳори нигаронӣ намуданд
Дар Душанбе ҷаласаи 18-уми Кумитаи ҳамоҳангсоз оид ба содагардонии расмиёти савдо баргузор гардид
Барои ифротӣ нагаштани ҷавонон таваҷҷуҳи онҳоро ба илму дониш ва касбу ҳунаромӯзӣ бояд ҷалб намуд
Масъулини вилояти Суғд баҳри ҳалли мушкилоти пойгоҳҳои обкашӣ ва норасоии обёрии замин вазифадор гардиданд
Лоиҳаи «Ташхиси сохтори бозори пул дар Ҷумҳурии Тоҷикистон» баррасӣ гардид
Дар оянда байни Душанбе ва Сеул роҳи ҳавоӣ кушода мешавад
8 АПРЕЛ-РӮЗИ ИҚТИСОДЧИЁН. Созмонҳои бонуфузи байналмилалии молиявӣ Тоҷикистонро давлати дорои суръати баланди рушди иқтисодӣ арзёбӣ намудаанд
Дар шаҳри Хуҷанд Намоишгоҳи X байналмилалии савдо «Суғд-2024» доир мегардад
Корхонаи давлатии фаръии «Обтаъминкунӣ» дар ноҳияи Ҳамадонӣ ба беш аз 4 ҳазор хоҷагӣ хизмат мерасонад
Дар Хатлон бо мақсади беҳтар гардонидани содироти маҳсулоти кишоварзӣ вохӯрӣ доир шуд
Тоҷикистон ва Туркманистон тасмим гирифтанд, ки нархгузории ягонаро барои интиқолдиҳандагон амалӣ намоянд
БАРОИ ҶАЛБИ БЕШТАРИ ҶАҲОНГАРДОН ЧӢ БОЯД КАРД? Дар Душанбе оид ба беҳтар намудани сатҳу сифати хизматрасонӣ ба сайёҳон ҳамоиш доир шуд