ЧҶ-2022. Имрӯз дастаҳои мунтахаби Марокаш бо Испания, Португалия бо Швейтсария барои роҳ ёфтан ба даври ¼-финал бозӣ мекунанд

ДУШАНБЕ, 06.12.2022 /АМИТ «Ховар»/. Имрӯз, 6 декабр дар шаҳри Ал Райяни Қатар бозии марҳилаи 1/8-финалии Чемпионати ҷаҳон-2022 оид ба футбол миёни дастаҳои мунтахаби Марокаш ва Испания баргузор мегардад, хабар медиҳад мухбири АМИТ «Ховар».

Пахши мустақими бозии Марокаш — Испания соати 20:00 ба вақти Душанбе оғоз шуда, барои тамошо дар шабакаҳои телевизионҳои варзишии Тоҷикистон- «Варзиш» ва «Футбол» имконпазир мегардад.

Шаби 6 ба 7 декабр дар Лусаил бозии 1/8-финалии Чемпионати ҷаҳон-2022 оид ба футбол баргузор мешавад, ки дар он дастаҳои мунтахаби Португалия ва Швейтсария бозӣ мекунанд.

Дар марҳилаи гурӯҳӣ Марокаш дар гурӯҳи «F» бо 7 имтиёз мақоми аввалро касб кард. Онҳо бар Белгия (2:0) ва Канада (2:1) ғолиб омада, бо Хорватия мусовӣ (0:0) намуданд.

Испания дар гурӯҳи «Е» дуюм шуда, 4 хол ба даст овард, бар дастаи Коста-Рика (7:0) ғолиб омад, бо Олмон мусовӣ (1:1) кард ва аз Ҷопон бо ҳисоби 1:2 шикаст хӯрд.

Пахши мустақими бозии Португалия ва Швейтсария соати 23:59 ба вақти Душанбе оғоз шуда, барои тамошо дар шабакаҳои телевизионҳои варзишии Тоҷикистон- «Варзиш» ва «Футбол» имконпазир мегардад.

Дар марҳилаи гурӯҳӣ Португалия дар гурӯҳи «Н» бо шаш имтиёз мақоми аввалро касб кард. Португалия бар Гана (3:2) ва Уругвай (2:0) пирӯз шуд ва аз Кореяи Ҷанубӣ (1:2) шикаст хӯрд.
Швейтсария дар гурӯҳи «G» аз Бразилия (0:1) шикаст хӯрда, бар Камерун (1:0) ва Сербия (3:2) пирӯзӣ ба даст овард ва дар ҷойи дуюм ба 1/8-финал роҳ ёфт.

АКС аз манбаъҳои боз