Jazeera Airlines Кувайтро бо Тоҷикистон мепайвандад

ДУШАНБЕ, 05.12.2022 /АМИТ «Ховар»/. Ширкати Jazeera Airlines ифтитоҳи хатсайри навро, ки Кувайт ва Тоҷикистонро бо ҳам мепайвандад, эълон намуд. Ҳамзамон ширкати мазкур ҳудуди парвозашро дар фазои пасошӯравӣ васеъ мегардонад. Тавре АМИТ «Ховар» хабар медиҳад, дар ин бора хадамоти матбуоти ширкат иттилоъ дод.

Jazeera Airlines мутмаин аст, ки аз хатсайри нав зоирине, ки нияти зиёрати ҷойҳои муқаддаси исломиро дар Арабистони Саудӣ доранд, истифода мебаранд. Инчунин ширкат самтҳои нави саёҳатро ба Осиёи Марказӣ пешниҳод менамояд.

Хати парвоз аз 29 декабр шурӯъ гардида, рӯзҳои панҷшанбе ва шанбе фаъолият менамояд. Ҳавопаймо дар Фурудгоҳи байналмилалии Душанбе (DYU) фуруд меояд.

Jazeera Airlines, ки соли 2004 ташкил шудааст, дорои тақрибан 20 ҳавопаймои Airbus 320 ва Airbus 321 мебошад.

Ҷадвали парвозҳо:

J9 631 панҷшанбе, шанбе: Кувайт (KWI)- Душанбе (DYU) 12:10-17:20

J9 632 панҷшанбе, шанбе: Душанбе (DYU)- Кувайт (KWI) 18:50-20:45

Азиза ДАДАБОЕВА.
АМИТ «Ховар»

АКС: АМИТ «Ховар»