Чунин вазъи ҳаво дар Тоҷикистон 15 сол пеш ба амал омада буд
![](https://khovar.tj/wp-content/uploads/2023/01/Havo-barf-27.jpg)
ДУШАНБЕ, 13.01.2023 /АМИТ «Ховар»/. Дар Тоҷикистон чунин вазъи ҳаво 15 сол пеш, яъне охири моҳи январ ва аввали моҳи феврали соли 2008 низ ба амал омада буд. Чунин ҳавои хунук дар мамлакат то 25 январи соли равон идома меёбад. Дар ин бора муовини Директори Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон Ҷамила Байдуллоева ба хабарнигори АМИТ «Ховар» иброз намуд.
Ҷамила Байдуллоева зикр кард, ки дар соли 2008 ҳарорат шабона дар водиҳо аз 20 то 25 дараҷа хунук буд. Аммо дар он шабу рӯз дар ВМКБ ҳарорат ба мисли ҳавои имсола паст нашуда буд.
Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ дод, ки аз 13 то 16 январи соли равон дар бештари ноҳияҳои водӣ-доманакӯҳии ҷумҳурӣ ҳарорати ҳаво шабона то 24 дараҷа хунук, рӯзона то 13 дараҷа хунук, дар ноҳияҳои кӯҳӣ шабона аз то 24 ва рӯзона то 15 дараҷа хунук пешгӯӣ мешавад.
Дар ин рӯзҳо дар шоҳроҳҳои минтақаҳои кӯҳии ҷумҳурӣ яхбандӣ боқӣ мемонад. Инчунин дар нишебиҳои ҷанубӣ ва шимолии қаторкӯҳҳои Ҳисор, минтақаҳои кӯҳии Ноҳияҳои тобеъи ҷумҳурӣ ва дар баъзе ноҳияҳои ғарбии Вилояти Мухтори Кӯҳистони Бадахшон сар задани зуҳуроти тарма дар назар аст.
Фирӯза ДАВЛАТЗОДА,
АМИТ «Ховар»
АКС: АМИТ «Ховар»