Дар Тоҷикистон бо мақсади баланд бардоштани ҳисси ватандӯстии ҷавонон озмун баргузор карда мешавад

Январь 24, 2023 10:39

ДУШАНБЕ, 24.01.2023. /АМИТ «Ховар»/. Бо мақсади баланд бардоштани ҳисси ватандӯстию меҳанпарастии ҷавонон Озмуни ҷумҳуриявии «Нақши Пешвои миллат дар таъсис ва ташаккули Қувваҳои Мусаллаҳи Ҷумҳурии Тоҷикистон» баргузор карда мешавад. Дар ин бора ба АМИТ «Ховар» дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Озмун аз ҷониби Кумитаи кор бо ҷавонон ва варзиш бахшида ба 30 – солагии таъсиси Қувваҳои Мусаллаҳи Ҷумҳурии Тоҷикистон доир карда шуда, дар он иштирокчиён метавонанд мақолаи беҳтаринро доир ба мавзӯи болозикр пешниҳод намоянд.

Ба ғолибон ва иштирокчиёни фаъоли озмун аз ҷониби Кумита туҳфаҳои хотиравӣ тақдим карда мешаванд.

Муҳлати қабули мақолаҳо то 18 феврали соли 2023, соати 17:00 муқаррар гардидааст.

Барои иштирок дар озмун ва дастрас намудани маълумоти иловагӣ хоҳишмандон метавонанд ба Кумитаи кор бо ҷавонон ва варзиши назди Ҳукумати Ҷумҳурии Тоҷикистон, кӯчаи Академик Раҷабовҳо 3 муроҷиат намоянд.

Бояд тазаккур дод, ки Ҳукумати мамлакат, бахусус Президенти Ҷумҳурии Тоҷикистон муҳтарам Эмомалӣ Раҳмон аз рӯзҳои нахустини таъсиси Қувваҳои Мусаллаҳи мамлакат бо вуҷуди имконияти ниҳоят маҳдуди иқтисодиву молиявӣ барои бунёди инфрасохтори низомӣ, таъсиси ҷузъу томҳои махсусгардонидашуда, таъмин кардани онҳо бо техникаву таҷҳизоти замонавӣ ва фароҳам овардани шароити зарурӣ тадбирҳои судманд андешиданд.

Дар таҳкими сулҳу суботи мамлакат саҳми ҷавонон муҳим арзёбӣ карда шуда, Президенти Ҷумҳурии Тоҷикистон муҳтарам Эмомалӣ Раҳмон дар Паёми худ ба Маҷлиси Олии Ҷумҳурии Тоҷикистон изҳор доштанд, ки «мо бо ҷавонони мамлакати худ ифтихор дорем, зеро онҳо дар рушди давлат ва ободии Ватан фаъолона саҳм мегузоранд, марзу буми сарзамини аҷдодиро ҳимоя мекунанд, ватандӯсту ватанпараст, бонангу номусанд ва ба халқу давлати Тоҷикистон содиқ мебошанд».

Ба ибрози Сарвари давлат, ба дастгириву ғамхорӣ фаро гирифтани ҷавонон, ҳалли мушкилоти ҳаёти онҳо ва истифодаи дурусту оқилона аз ин захираи стратегии миллӣ ба хотири ободиву пешрафти Ватан ва таъмини амнияту суботи ҷомеа аз ҷумлаи масъалаҳои муҳимтарине мебошанд, ки таҳти таваҷҷуҳи хоссаи Ҳукумати мамлакат қарор доранд, зеро Тоҷикистон худ давлати ҷавонон аст.

Аз ин хотир дар мамлакат «Барномаи давлатии тарбияи ватандӯстӣ ва таҳкими ҳувияти миллии ҷавонони Тоҷикистон барои солҳои 2023 – 2027» қабул гардид, ки ҳадафи он баланд бардоштани ҳувияту ватандӯстии ҷавонон ва таҳким бахшидани мавқеи онҳо дар ҷомеа мебошад.

Зарангези ЛАТИФ,
АМИТ «Ховар»

АКС: Хадамоти матбуоти Президенти Ҷумҳурии Тоҷикистон /АМИТ «Ховар»

Январь 24, 2023 10:39

Хабарҳои дигари ин бахш

Ба муносибати Рӯзи байналмилалии ҳифзи ҳуқуқи кӯдак дар боғи «Курӯши Кабир» чорабинии тантанавӣ баргузор шуд
Рӯзи байналмилалии ҳифзи кӯдакон аҳамияти кӯдаконро дар ҳаёт ва ҷомеаи мо ҳамчун узви муҳими ҷомеа таъкид менамояд
1 ИЮН-РӮЗИ БАЙНАЛМИЛАЛИИ КӮДАКОН. Кӯдакон сарвати бебаҳо ва фардои дурахшони миллатанд
Дар шаҳри Бохтар бахшида ба Рӯзи байналмилалии ҳифзи кӯдакон ҳамоиш доир шуд
«КӮДАКОН-ДУНЁИ МОЯНД!». Имрӯз дар Тоҷикистон Рӯзи байналмилалии ҳифзи кӯдакон ботантана таҷлил мегардад
Маркази ҳамкории Тоҷикистону Чин оид ба мубориза бар зидди нобиноӣ ифтитоҳ гардид
Бахшида ба Рӯзи байналмилалии ҳимояи кӯдакон дар ноҳияи Рашт барномаи бошукуҳи идона доир гардид
Камолиддин Назирзода: «Конфронси байналмилалии сатҳи баланд оид ба ҳифзи пиряхҳо барои тақвияти ҳамкорӣ такони бузург аст»
ТОБИСТОН ФАРО МЕРАСАД. Имсол Тоҷикистонро дар ин фасл чӣ гуна ҳаво интизор аст?
Дурнамои ҳамкории Тоҷикистон ва Иттиҳоди Аврупо баррасӣ карда шуд
Директори Агентии обуҳавошиносӣ: «Конфронси имрӯза заминаи боэътимод дар самти ҳифзи пиряхҳо дар минтақа мегардад»
Дар доираи Ҳафтаи кӯдакон ва наврасони шаҳри Душанбе дар Боғи кӯдакон барномаи бошукуҳи фарҳангӣ доир мешавад