Навъи нави коронавирус баъд аз ИМА ба Африқои Ҷанубӣ расид

ДУШАНБЕ, 10.01.2023 /АМИТ «Ховар»/. Зернавъи нави коронавируси навъи Омикрон, XBB.1.5, тамоми минтақаҳои бузурги ИМА-ро фаро мегирад ва чанд рӯз пеш дар Африқои Ҷанубӣ низ ошкор карда шуд. Ҳарчанд, тибқи омор, ин кишвари африқоӣ аз пандемияи COVID-19 бештар осеб дидааст, ба назар чунин мерасад, ки олимон аз «мавҷи бузург»-и сироятҳои нав ҳарос надоранд. Дар ин бора АМИТ «Ховар» бо истинод ба «Euronews» хабар медиҳад.

«Мавҷи азими сироятҳоро бо бистарӣ шудан дар беморхонаҳо бинобар сабаби масунияти баланди аҳолӣ дар Африқои Ҷанубӣ ва мавҷҳои қаблии навъҳои омикрон интизор надорам», — изҳор дошт вирусшиноси Африқои Ҷанубӣ Тулио де Оливейра, ки аввалин шуда навъҳои бета ва омикронро ошкор карда буд.

Дар Африқои Ҷанубӣ, ки он ҷо аввалин ҳолати сироятёбӣ аз навъи омикрон охири соли 2021 муайян карда шуда буд, ҳоло беш аз чор миллион ҳолати гирифторӣ ва беш аз 102,500 фавт бар асари коронавирус ба қайд гирифта шудааст.

Танҳо 48% Африқои Ҷанубӣ, ки мебоист ба эмкунӣ фаро гирифта шаванд, ин тартибро анҷом додаанд.

Ба таъкиди Созмони ҷаҳонии тандурустӣ, зернавъи XBB.1.5 — вируси насли сеюм дар оилаи Омикрон буда, аз миёни зернавъҳои то имрӯз ошкоршуда ба осонӣ гузарандатарин ба ҳисоб меравад.

Тавре Тулио де Оливейра мегӯяд, зернавъ рӯзи ҷумъаи гузашта дар Африқои Ҷанубӣ ошкор гардид — дар намунае, ки охири моҳи декабр гирифта шудааст. Бо вуҷуди ин, дар ин марҳила «зиёдшавии ҳолатҳои сироятёбӣ, бистарӣ шудан ё фавт» мушоҳида нашудааст.

Зернавъи XBB.1.5 аллакай дар тақрибан 30 кишвар мавҷуд аст, махсусан дар Аврупо ва ИМА, ки дар он ҷо тадриҷан бартарият пайдо мекунад. Хусусиятҳои он ҳанӯз маълум нестанд. Аммо, тибқи маълумоти пешакӣ, вояи бустернии ваксинаи бивалентӣ, бино ба таъкиди СҶТ, бояд ба тавлиди подтан оварда расонад.

АКС: bbc.com