РОҲБАРИ СММ БА «ИНҚИЛОБ» ДАР СОҲАИ МТЭ ДАЪВАТ НАМУД. Дар Тоҷикистон 98 фоизи неруи барқ бо истифодаи захираҳои обӣ истеҳсол мешавад

Январь 17, 2023 11:28

ДУШАНБЕ, 17.01.2023 /АМИТ «Ховар»/. Истифодаи васеи неруи барқ  аз манбаъҳои таҷдидшаванда- роҳи ягонаи боэътимоди пешгирии офатҳои иқлимӣ мебошад. Дар ин бора рӯзи шанбеи 14 январ Дабири кулли СММ иброз дошта, нақшаи гузариши одилонаро ба манбаъҳои таҷдидшаванда*, ки аз панҷ банд иборат аст, пешниҳод кард, хабар медиҳад АМИТ «Ховар» бо истинод ба Хабарҳои СММ.

Манфиати ҷамъиятии глобалӣ

«Танҳо гузаштан ба манбаъҳои таҷдидшаванда имкон медиҳад ояндаи мо ҳифз шавад, холигоҳи дастрасӣ ба неруи барқ паси сар гардад, нархҳо мӯътадил ва амнияти энергетикӣ таъмин шавад»,- иброз дошт  Антониу Гутерриш дар паёми видеоии худ ба иштирокчиёни иҷлосияи 13-уми Ассамблеяи Агентии байналмилалии энергияи таҷдидшаванда. Форум рӯзи шанбе дар шаҳри Абузабии Имороти Муттаҳидаи Араб кушода шуд.

Роҳбари СММ ҳушдор дод, ки ҷаҳон то ба ҳол аз вобастагӣ ба  сӯзишвории истихроҷшаванда ранҷ мекашад, ҳадафи нигоҳ доштани гармӣ дар ҳудуди 1,5 дараҷа тибқи ҷадвали Селсия аз ҳадди имкон берун меравад. «Агар сиёсати кунунӣ идома ёбад, гармшавии глобалӣ то охири аср ба 2,8 дараҷа мерасад. Оқибатҳои ин барнома харобиовар хоҳанд буд. Якчанд минтақаҳои сайёра барои зистан номувофиқ хоҳанд шуд. Барои бисёриҳо ин ба ҳукми қатл баробар аст»,-гуфт Антонио Гутерриш.

Дабири кулли Созмони Милали Муттаҳид даъват мекунад, ки ҳама монеаҳои марбут ба ҳуқуқи моликияти зеҳнӣ дар соҳаи технологияҳои энергияи таҷдидшаванда аз байн бардошта шаванд ва ин дониш моли ҷомеа эълон карда шавад. Ин яке аз нуктаҳои нақшаи пешниҳодкардаи роҳбари СММ мебошад.

Ӯ ҳамчунин тавсия медиҳад, ки дастрасӣ ба занҷирҳои таъминот бо ашёи хом ва ҷузъҳои технологияҳои таҷдидшаванда васеъ карда шавад.

«Ин имкон медиҳад, ки дар кишварҳои рӯ ба тараққӣ миллионҳо ҷойҳои кори “сабз”, бахусус барои занон ва ҷавонон фароҳам оварда шаванд»,-зикр намуд ӯ.

Дар айни замон, хотиррасон намуд ӯ, энергия аз манбаъҳои таҷдидшаванда 30 дарсади эҳтиёҷоти ҷаҳониро ба неруи барқ ​​ таъмин мекунад. Ба гуфтаи Гутерриш, ин нишондиҳанда бояд то соли 2030 ду баробар афзоиш дода шуда, то миёнаҳои аср ба 90 дарсад расонида шавад.

Маблағ барои кумак ҷудо гардад!

Дабири кулли Созмони Милали Муттаҳид кишварҳоро даъват мекунад, ки ба зудӣ тарҳҳои энергетикии устуворро амалӣ созанд, низоми энергетикиро навсозӣ кунанд ва барои маблағгузории ин гуна барномаҳо кумак намоянд. Вай зарурати аз сӯзишвории истихроҷшаванда ба энергияи тоза ва дастрас гузаштанро таъкид мекунад. Ҳамзамон Антониу Гутерриш бар ин назар аст, ки дар давраи гузариш бояд қишрҳои осебпазири аҳолӣ дастгирӣ карда шаванд.

Роҳбари Созмони Милали Муттаҳид пешниҳод мекунад, ки ба энергияи таҷдидшаванда сармоягузорӣ карда шавад*. Вай чунин меҳисобад, ки ҳаҷми умумии сармоягузории хусусӣ ва давлатӣ бояд дар як сол то ба чаҳор триллион доллар расонида шавад.

Дабири кулл аз ҳама ҷонибҳо даъват кард, ки арзиши энергияро аз манбаъҳои таҷдидшаванда  коҳиш диҳанд ва ҳамчунин ҷараёни молиявиро ба кишварҳое, ки ба онҳо бештар ниёз доранд, равона созанд.

 «Энергияи сабз»* дар Тоҷикистон

Ҳоло, хотиррасон кард роҳбари СММ Антониу Гутерриш, энергия аз манбаъҳои таҷдидшаванда* 30 фоизи талаботи ҷаҳониро ба неруи барқ таъмин мекунад. Ба гуфтаи Гутерриш, ин нишондиҳанда бояд то соли 2030 ду баробар афзоиш ёфта, то миёнаҳои аср ба 90 дарсад расонида шавад.

Ёдовар мешавем, ки «дар Тоҷикистон 98 дарсади неруи барқ ​​бо истифода аз захираҳои обӣ тавлид мешавад, кишвар аз рӯи фоизи тавлиди “энергияи сабз” дар ҷаҳон ҷои шашумро ишғол мекунад. Тавре АМИТ «Ховар» қаблан хабар дода буд, дар ин бора моҳи июли соли гузашта Президенти Ҷумҳурии Тоҷикистон Эмомалӣ Раҳмон зимни суханронӣ дар мулоқот бо бинокорони НБО «Роғун» гуфта буданд. Илова бар ин, ба таъкиди Пешвои миллат, Тоҷикистон аз ҷиҳати партови газҳои гулхонаӣ дар ҷаҳон яке аз ҷойҳои баландтаринро ишғол мекунад. Сарвари давлат дар ин робита иброз намуданд, ки афзоиши истеҳсол ва истифодаи васеи «энергияи сабз»* яке аз самтҳои афзалиятноки рақобатпазирии иқтисоди кишвари мо маҳсуб мешавад.

ДАР АКС: Моҳи июни соли 2017 Дабири кулли СММ Антониу Гутерриш ба Тоҷикистон ташриф оварда, аз кӯли Сарез дидан кард.

«Мо ният дорем, ки ин имконияти бузургро дар шароити тағйирёбии иқлими ҷаҳонӣ на танҳо ба манфиати худамон, балки ба манфиати Осиёи Марказӣ ва Ҷанубӣ низ истифода барем. Дар ин росто мо барои зиёд намудани истеҳсоли неруи барқ ​​ва тавсеаи шабакаҳои интиқоли он корҳои назаррас анҷом додем», — таъкид доштанд Президенти Тоҷикистон Эмомалӣ Раҳмон.

____________

* «Энергияи сабз» энергияест, ки аз манбаъҳои таҷдидшавандаи энергия (МТЭ) гирифта мешавад, ки дар миқёси инсонӣ тамомнашаванда маҳсуб мешаванд. Энергияи таҷдидшаванда аз захираҳои табиӣ, ба монанди ҷараёни об, нури Офтоб, шамол ба даст оварда мешавад.

Назокат ҚОДИРЗОДА,
АМИТ «Ховар»

АКС: АМИТ «Ховар»

Январь 17, 2023 11:28

Хабарҳои дигари ин бахш

Ҳайати Тоҷикистон бо раиси Бонки миллии Швейтсария роҳҳои тақвияти ҳамкориро баррасӣ намуд
Ҳайати Тоҷикистон дар мулоқот бо намояндагони Хазинаи Байналмилалии Асъор масъалаҳои марбут ба низоми бонкиро баррасӣ намуд
Саҳми Бонки ҷаҳонӣ дар татбиқи ислоҳоти сохтории иқтисодиёти Тоҷикистон назаррас арзёбӣ гардид
Намоишгоҳи молу маҳсулоти корхонаҳои саноатии Узбекистон дар маркази ЭКСПО-и шаҳри Душанбе то 21 апрел идома меёбад
Дар қаламрави Тоҷикистону Узбекистон қариб 400 корхонаи муштарак фаъолият менамояд
Дар вилояти Хатлон татбиқи 368 лоиҳа ба маблағи 8,5 миллиард сомонӣ пешбинӣ шудааст
Вазири кишоварзии Узбекистон дар шаҳри Ҳисор бо фаъолияти корхонаи «Агротехсервис» шинос гардид
«Гардиши мол байни ду давлат дар ояндаи наздик ба 1 миллиард доллари амрикоӣ расонида мешавад», — бардошт аз Форуми соҳибкорию сармоягузории Тоҷикистон ва Узбекистон
Ҳайати Тоҷикистон бо роҳбарияти IFC роҳҳои тавсеаи ҳамкориро баррасӣ намуд
Дар Душанбе ҷаласаи Кумитаи муштараки роҳбарикунанда оид ба муаррифии ҳисоботи СММ баргузор шуд
Татбиқи лоиҳаҳои муштарак байни Тоҷикистон ва Узбекистон баррасӣ шуд
Ҳайати Тоҷикистон дар Бонн бо намояндагони Вазорати федералии Олмон оид ба ҳамкории иқтисодӣ ва рушд мулоқот намуд