Имсол дар Тоҷикистон дар майдони 4938 гектар сабзӣ кишт карда мешавад

ДУШАНБЕ, 26.02.2023 /АМИТ «Ховар»/. Дар Тоҷикистон соли 2023 дар майдони 4938 гектар сабзӣ кишт карда мешавад, ки 1770 гектари онро кишти барвақтӣ ташкил медиҳад, иттилоъ доданд ба АМИТ «Ховар» дар Вазорати кишоварзии мамлакат.

Ба иттилои манбаъ, соли сипаригардида кишоварзони мамлакат 499 170 тонна сабзӣ ҷамъоварӣ намуданд.

Сабзӣ дар Тоҷикистон яке маҳсулоти асосии истеъмолӣ дониста мешавад. Инчунин он аз ҷиҳати иқтисодӣ муҳимтарин сабзавоти ҷаҳон ба ҳисоб меравад. Сабзӣ инчунин барои бисѐр кишварҳои ҷаҳон маҳсулоти асосии содиротии кишоварзӣ мебошад. Чин тайи солҳои тӯлонӣ кишвари асосии истеҳсолкунандаи сабзӣ дар ҷаҳон аст. Яке аз дигар давлатҳои асосии истеҳсолкунандаи сабзӣ Штатҳои Муттаҳидаи Америка мебошад.

Тибқи маълумоти оморӣ, соли 2022 ба хориҷи мамлакат 5 ҳазору 600 тонна сабзӣ содирот карда шудааст.

Муовини Раиси Раёсати Иттифоқи «Тоҷикматлубот» Хуршед Раҳмонализода зимни нишасти матбуотӣ иттилоъ дод, ки ҷиҳати иҷрои Қарори Ҳукумати Ҷумҳурии Тоҷикистон «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2022-2023» дар анбору сардхонаҳои Раёсати Иттифоқи «Тоҷикматлубот» дар ҳамкорӣ бо соҳибкорон 100 тонна сабзӣ захира карда шудааст.

«Дар айни замон дар анбору чоҳҳои нигоҳдории махсус миқдори зиёди сабзӣ низ мавҷуд аст. Аз ин рӯ мо давра ба давра бозори истеъмолиро бо ин навъи маҳсулот таъмин менамоем», — гуфт номбурда.

Сабзӣ зироати дусола буда, дар соли якум баъди бо тухмаш коридан бехмева дода, дар соли дуюм баъди шинондани бехмевааш тухмӣ медиҳад. Тибқи маълумоти олимони соҳаи кишоварзӣ, 355 намуди сабзӣ мавҷуд аст. Сабзӣ аз реша, поя, барг ва гулҳо иборат аст. Решааш ба умқи замин паҳн гардида, растаниро бо ғизо ва намӣ таъмин мегардонад. Ин растанӣ гармиро меписандад ва ҷамъоварии ҳосили он дар як сол ду маротиба мебошад. Дар Ҷумҳурии Тоҷикистон сабзӣ дар заминҳои васеъ ва наздиҳавлигӣ парвариш карда мешавад.

Дар таркиби сабзӣ витаминҳои А, С, Е, Р, В3, В5 мавҷуд буда, аз кислотаҳои органикӣ бой мебошад. Таркиби сабзӣ аз равғани эфирӣ, минералҳо, сафеда, карбогидрат, калий, калсий, магний, натрий, об ва дигар моддаҳо ғанӣ буда, онҳо ба муқобили бактерия ва микробҳои зараровар мубориза мебаранд. Витамини С масуниятро баланд гардонида, сохтори рагҳои хунгардро ба танзим медарорад. Истифодаи афшураи сабзӣ масуниятро балан бардошта, ба шахсони гирифтори бемории санги талха ва барои мулоим нигоҳ доштани пӯсти дасту рӯй истеъмоли нӯшобаи сабзӣ тавсия дода мешавад.

Мутахассисон дар байни рустаниҳо ва дигар гиёҳҳои табобатӣ ба хусусияти фоидабахшии сабзӣ афзалият додаанд. Инчунин сабзӣ барои одамони гирифтори камхунӣ низ муфид аст. Дар ин ҳолат тавсия мешавад, ки шарбати сабзӣ бинӯшед. Ин шарбат бо хастагӣ мубориза мебарад ва гардиши хунро беҳтар мекунад.

Фирӯза ДАВЛАТЗОДА,
АМИТ «Ховар»

АКС аз манбаъҳои боз