Роҳбарияти Федератсияи футболи Тоҷикистон дар Конгресси 33-юми Конфедератсияи футболи Осиё иштирок кард

ДУШАНБЕ, 02.02.2023 /АМИТ «Ховар»/. 1 феврал дар пойтахти Баҳрайн — шаҳри Манама Конгресси 33-юми Конфедератсияи футболи Осиё (КФО) баргузор шуд. Дар кори конгресс роҳбарияти Федератсияи футболи Тоҷикистон – ноиби аввали президенти федератсия Хуршед Мирзо, дабири кулл Фурқат Ахмедҷонов ва сардори департаменти байналмилалии Федератсияи футболи Тоҷикистон Давлатманд Исломов иштирок намуданд. Дар ин хусус АМИТ «Ховар» бо истинод ба Федератсияи футболи Тоҷикистон иттилоъ медиҳад.

Дар Конгресс Президенти Конфедератсияи футболи Осиё Шайх Салмон бин Иброҳим Ал Халифа ба муҳлати чор сол аз нав интихоб гардид.

«Мехоҳам ба ҳамаи шумо, ки барои як муҳлати чорсолаи дигар ба ман бовар кардед, ташаккур гӯям. Футболи Осиё ба давраи нав ворид мешавад», – гуфт Шайх Салмон бин Иброҳим Ал Халифа пас аз дубора интихоб шуданаш ба вазифаи президенти Конфедератсия.

Ҳамзамон Шайх Салмон бин Иброҳим Ал-Халифа ноиби президенти ФИФА аз Осиё шуд.

Рӯзномаи Конгресси Баҳрайн масъалаҳои интихоби ноибони президенти КФО, инчунин аъзои Кумитаи иҷроияи КФО ва Шӯрои ФИФА-ро дар бар мегирифт.

Ғайр аз ин, Арабистони Саудӣ макони баргузории қисми ниҳоии Ҷоми Осиё-2027 тасдиқ карда шуд.

Ёдовар мешавем, ки дар Арабистони Саудӣ бори аввал дар таърих мусобиқаи асосии футболи қитъаи Осиё баргузор карда мешавад.

Азиза ДАДАБОЕВА,
АМИТ «Ховар»

Акс: ФФТ