Дар Комиссияи олии аттестатсионӣ дар мавзуи муқовимат ба коррупсия ҷаласаи машваратӣ доир гардид

Март 14, 2023 13:24

ДУШАНБЕ, 14.03.2023. /АМИТ «Ховар»/. Аз ҷониби масъулин баланд бардоштани самаранокии кори шўроҳои диссертатсионӣ дар самти муқовимат ба коррупсия, пешгирӣ намудан аз хавфу хатарҳои амалҳои коррупсионӣ ҳангоми ташкил ва баргузор намудани ҳимояҳои диссертатсияҳо ва ба вуҷуд овардани фарҳанги муқовимат ба коррупсия аз ҷумлаи афзалиятҳои муҳим маҳсуб мешавад. Ин матлаб зимни ҷаласаи машваратӣ, ки 13 март дар Комиссияи олии аттестатсиони назди Президенти Ҷумҳурии Тоҷикистон бо иштироки намояндаи Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳри Душанбе ва раисону котибони илмии шўроҳои диссертатсионӣ баргузор шуд, баён гардид.

Тавре аз Комиссияи олии аттестатсионӣ ба АМИТ «Ховар» хабар доданд, дар ҷаласа раиси Комиссия Абдулҳаким Розиқзода иброз дошт, ки «дар асоси дастуру супоришҳои мунтазами Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мубориза бо коррупсия дар ҷумҳурӣ вусъат дода мешавад. Бо Фармони Президенти мамлакат аз 3 августи соли 2021 «Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030» тасдиқ гардидааст».

«Ҷаласаи имрўза низ яке аз чорабиниҳои Комиссияи олии аттестатсионӣ аст, ки ҷиҳати татбиқи Стратегияи мазкур амалӣ мегардад. Коррупсия яке аз зуҳуроти хавфноки ҷомеа буда, дар миқёси ҷаҳонӣ ҳамчун ҷинояти вазнин ва яке аз унсурҳои таҳдидкунанда ба амнияти миллии давлатҳо ва халалдоркунандаи рушду суботи иҷтимоию иқтисодии онҳо эътироф гашта, ба пешрафти тамоми соҳаҳои ҳаёти ҷомеа халал мерасонад. Ин тамоюли номатлуб бунёди ҷомеаи демократиро заиф сохта, ба рушди он таъсири манфӣ мегузорад»,- тазаккур дод номбурда.

Гуфта шуд, ки мутаассифона, имрӯзҳо хавфи коррупсия дар шўроҳои диссертатсионӣ зиёд шуда, дар ин самт роҳандозӣ намудани тадбирҳои мушаххасу муассир зарур аст. Овозаҳо ва сару садоҳои зиёд ба Комиссия мерасанд, ки аз ҷой доштани амалҳои коррупсионӣ дар кори баъзе шўроҳои диссертатсионӣ дарак медиҳанд. Комиссия аз ҷониби худ ҳеҷ гоҳ ба ин падида роҳ намедиҳад ва бо он муборизаи беамон мебарад.

Таъкид шуд, ки барои пешгирии амалҳои коррупсионӣ ва дигар тамоюлҳои барои илм бегонаву номатлуб Комиссия мунтазам тадбирҳои муассир меандешад.

Хотиррасон гардид, ки баланд бардоштани сатҳи муқовимат ба коррупсия аз ҷониби раисон ва котибони илмии шўроҳои диссертатсионӣ тавассути ташкил ва гузаронидани чорабиниҳои тарғиботиву ташвиқотӣ тақозои замон маҳсуб мешавад. Вобаста ба ин, аз ҷониби Комиссия мунтазам мулоқоту суҳбатҳо бо кормандони масъули мақомоти ҳизфи ҳуқуқ, нашр намудани маводи иттилоотӣ, мақолаҳои илмӣ ва баромад тавассути ВАО роҷеъ ба муқовимат ба коррупсия ташкил ва баргузор мегардад.

Сардори шуъбаи муқовимат ба коррупсияи Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳри Душанбе, подполковники адлия Шодком Турсунзода гуфт, ки «Ҷумҳурии Тоҷикистон Конвенсияи СММ зидди коррупсияро 25 сентябри соли 2006 ба имзо расонида, 16 апрели соли 2008 тасдиқ намудааст. Он ҳамчун ҳуҷҷати ҳуқуқии комили байналмилалии зиддикоррупсионӣ дар ҷаҳон эътироф шудааст. Конвенсияи СММ зидди коррупсия тартиби ҳамаҷонибаи таҳия ва татбиқи чораҳои зиддикоррупсиониро пешбинӣ менамояд».

Зарур дониста шуд, ки дар самти аттестатсияи кормандони илмӣ ва илмӣ-техникии тахассуси олӣ ҳамаи субъектони муқовимат ба коррупсия бо мақсади пешгирии содиршавии ҷиноятҳои коррупсионӣ тарғибу ташвиқи зиддикоррупсиониро тариқи сомонаҳои расмӣ пурзӯр намоянд.

Байни иштирокчиён ва сардори шуъбаи Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаҳри Душанбе вобаста ба рӯзномаи маҷлис мубодилаи озоди афкор сурат гирифта, ташкил гардидани чунин мулоқоти саривақтӣ аз ҷониби ҳозирин муфид арзёбӣ гардид.

Дар қисмати дигари машварат раиси Комиссия оид ба як қатор камбудиҳои такроршаванда дар парвандаҳои аттестатсионӣ ва диссертатсияҳо бо мисолҳои мушаххас баромад намуда, ислоҳи онҳоро ба манфиати кор донист.

АКС: Комиссияи олии аттестатсиони назди Президенти Ҷумҳурии Тоҷикистон

Март 14, 2023 13:24

Хабарҳои дигари ин бахш

Котиби Шурои амнияти Тоҷикистон Юсуф Раҳмон бо Котиби давлатии Шурои амнияти Ҷумҳурии Беларус Александр Волфович мулоқот намуд
Котиби Шурои амнияти Тоҷикистон бо Мушовири Шурои амнияти миллии Ҷумҳурии Ироқ мулоқот намуд
Дар вилояти Хатлон 128 ҳодисаи садамавии роҳу нақлиёт ба қайд гирифта шуд
Дар ҷаласаи Шурои вазирони мудофиаи давлатҳои аъзои СААД ҳамкорӣ дар соҳаи ҳарбӣ баррасӣ карда шуд
Котиби Шурои амнияти Тоҷикистон дар Вохӯрии 13-уми байналмилалии намояндагони баландмақоми бахши амният иштирок намуд
Аз 29 то 31 май дар Душанбе ҳаракати воситаҳои нақлиёт муваққатан маҳдуд карда мешавад
«ЗАМИН», «МАРЗ» ВА «ВАТАН» — УНСУРҲОИ МУҚАДДАС ВА ҲАЁТАН МУҲИМ. Ба Рӯзи Қӯшунҳои сарҳадӣ бахшида мешавад
Дар Бадахшон 31-солагии таъсиси Қӯшунҳои сарҳадӣ таҷлил гардид
Мубориза ба муқобили терроризми байналмилалӣ масъалаи афзалиятноки замони муосир аст
«КОРВОНИ ДИДОР». Модарон дар қисмҳои ҳарбӣ бо шароити хизмати фарзандон шинос мешаванд
Дар Душанбе ду далели вайрон намудани қоидаҳои истифодаи неруи барқ ошкор карда шуд
Дар Душанбе ҷаласаи Шурои роҳбарони ниҳодҳои амниятӣ ва хадамоти махсуси кишварҳои аъзои Иттиҳоди Давлатҳои Мустақил оғоз шуд