Дар шаҳри Душанбе 4 омӯзгори як муассиса ғолиби озмуни байналмилалӣ шуданд

ДУШАНБЕ, 09.03.2023. /АМИТ «Ховар»/. Омӯзгорони шаҳри Душанбе дар Озмуни байналмилалии «Беҳтарин мақолаи илмӣ-2023», ки 5 март дар шаҳри Тошканди Ҷумҳурии Узбекистон баргузор гардид, ғолиб омада, бо сертификат ва медали сарисинагӣ қадрдонӣ карда шуданд. Дар ин хусус ба АМИТ «Ховар» сардори Раёсати муассисаҳои таҳсилоти томактабӣ ва миёнаи умумии Сарраёсати маорифи шаҳри Душанбе Асомиддин Бобозода хабар дод.

Озмуни мазкур дар шаҳри Тошканди Ҷумҳурии Узбекистон байни кишварҳои узви Иттиҳоди давлатҳои мустақил баргузор гардида, дар он аз 8000 иштирокчӣ 200 нафари беҳтарин бо ҷоиза қадрдонӣ карда шуд.

Аз ҷумла, директори Литсейи №2 барои хонандагони болаёқати шаҳри Душанбе Ҷамолиддин Сироҷзода, омӯзгорони фанни технологияи иттилоотӣ Низомиддин Ҷумаев, омӯзгори фанни забон ва адабиёти рус Арзу Манафова ва омӯзгори химия Гулноз Наботова ғолиби ин озмуни байналмилалӣ  дониста шуданд.

АКС: Сарраёсати маорифи шаҳри Душанбе