БА ИСТИҚБОЛИ 35-СОЛАГИИ ИСТИҚЛОЛИ ДАВЛАТӢ. Дар шаҳри Бӯстон мумфаршкунии роҳҳо оғоз ёфт

ДУШАНБЕ, 21.04.2023 /АМИТ «Ховар»/. Дар шаҳри Бӯстон бо иштироки роҳбарияти  вилояти Суғд ба мумфаршкунии роҳҳои дохилӣ оғоз бахшида шуд. Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Дар суҳбат бо сокинон роҳбарияти  вилоят доир ба ҷараёни корҳои ободониву созандагӣ ба истиқболи 35-солагии Истиқлоли давлатии Ҷумҳурии Тоҷикистон дар шаҳру ноҳия маълумот дода, таъкид кард, ки дар доираи бунёдкориҳо​ тибқи нақша​, соли равон таъмиру тармими беш аз​ 2000 км роҳ ба нақша гирифта шудааст, ки аз он 228 км таъмири асосӣ, 975​ км таъмири ҷорӣ ва 799​ км шағалпӯш карда мешавад.

Гуфта шуд, ки бо дастуру ҳидоятҳои Пешвои миллат муҳтарам Эмомалӣ Раҳмон марҳила ба марҳила роҳҳои дохилии шаҳру ноҳияҳо мумфарш карда хоҳад шуд.

Тавре иттилоъ дода шуд, роҳи кӯчаҳои ба номи Абдураҳмони Ҷомӣ ва Носири Хусрави шаҳри Бӯстон ба масоҳати 4700 метри мураббаъ ва бо паҳноии шаш метр бо маблағгузории мақомоти иҷроияи ҳокимияти давлатии вилоят мумфарш карда мешавад.

Фармоишгари корҳо Идораи сохтмони асосии вилояти Суғд ва пудратчӣ ҶДММ «Ширкати истеҳсолӣ-сохтмонии Файз» мебошад.

АКС: Хадамоти матбуоти Раиси вилояти Суғд