БАХШИДА БА 35-СОЛАГИИ ИСТИҚЛОЛИ ДАВЛАТӢ. Дар шаҳри Ҳисор сохтмони шифохона барои бемориҳои қалб идома дорад

ДУШАНБЕ, 15.04.2023 /АМИТ «Ховар»/. Дар доираи омодагиҳо ба таҷлили ҷашни 35–солагии Истиқлоли давлатии Ҷумҳурии Тоҷикистон ва раванди корҳои бунёдию созандагӣ дар мамлакат дар  деҳаи Хонақоҳи Ҷамоати деҳоти Хонақоҳи Кӯҳии шаҳри Ҳисор  ояндаи наздик беморхона барои табобати бемориҳои қалб, ки сохтмонаш алҳол идома дорад,  ба истифода дода мешавад.

АМИТ «Ховар» бо истинод ба мақомоти иҷроияи ҳокимияти давлатии шаҳри Ҳисор иттилоъ медиҳад, ки бунёди ин муассисаи тандурустӣ  бо саҳми соҳибкорону аҳолии деҳот ва дастгирии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон  идома дошта, дорои 30 кат хоҳад буд.

Роҳбарияти шаҳри Ҳисор  ва сардухтури беморхонаи марказии шаҳр ба маҳали сохтмон рафта,  бо ҷараёни корҳо дар иншооти тандурустӣ шинос шуданд.

Ҳамзамон бо масъулон оид ба муҳлати анҷоми корҳо ва ҷиҳозонидани утоқҳои корӣ бо таҷҳизот, ободонии саҳни беморхона ва атрофи он суҳбат намуданд.

АКС: Мақомоти иҷроияи ҳокимияти давлатии шаҳри Ҳисор