Дар Донишгоҳи давлатии Кӯлоб Маркази омӯзишии «Русское пространство» кушода шуд

КӮЛОБ, 06.04.2023. /АМИТ «Ховар»/. Дар Донишгоҳи давлатии Кӯлоб ба номи Абуабдулллоҳи Рӯдакӣ Маркази омӯзишии забони русии «Русское пространство» кушода шуд, хабар медиҳад мухбири минтақавии АМИТ «Ховар» Сулаймон Холзода.

Ёдовар мешавем, ки соли 2023 дар Тоҷикистон Соли забони русӣ эълон гардидааст. Ин сол на танҳо дар Тоҷикистон, балки дар саросари Иттиҳоди давлатҳои мустақил Соли забони русӣ ҳамчун забони муоширати байни миллатҳо эълон шуда, дар ин бора қарори дахлдори сарони тамоми мамлакатҳои узви Иттиҳод қабул гардид.

Мақсад аз таъсиси марказ он аст, ки донишҷӯёну омӯзгорони донишгоҳ сатҳи забондонии худро беҳтар ва дониши худро афзун кунанд. Роҳбарии маркази мазкурро номзади илмҳои филологӣ, муаллими кафедраи адабиёти хориҷӣ бо методикаи таълими забонҳои англисӣ ва русӣ Азамат Ашуров ба уҳда дорад.

Маркази мазкур бо дастгирии роҳбарияти  донишгоҳ дар якҷоягӣ бо Сафорати Русия дар Тоҷикистон ва Донишгоҳи славянии Русия ва Тоҷикистон мавриди истифода қарор гирифт.

Тибқи нақша, чорабиниҳои донишгоҳ ва ҳамчунин ҷиҳати ҳамкорӣ бо Донишгоҳи Омски Федератсияи Русия дарсҳо бо донишҷӯёни факултетҳои донишгоҳ ба муддати як ҳафта аз ҷониби омӯзгорони ботаҷрибаи Донишгоҳи Омск гузаронида мешаванд.

Муддати се рӯз мешавад, ки дар марказ аз ҷониби яке аз омӯзгорони Донишгоҳи Омск, номзади илмҳои филологӣ, дотсент Марина Терских барои донишҷӯёни факултетҳои донишгоҳ машғулият гузаронида шуда истодааст.

Бояд гуфт, ки дар асоси ҳамкорӣ байни донишгоҳҳо чунин омӯзишҳо бештар гардида, омӯзгорони соҳибтаҷриба аз Донишгоҳи Омск ба омӯзгорону донишҷӯёни Донишгоҳи давлатии Кӯлоб барои боз ҳам беҳтар намудани сатҳи дониш ва баланд бардоштани савияи забони русиашон дарс мегузаранд.

АКС: Донишгоҳи давлатии Кӯлоб