Дар хоҷагиҳои деҳқонии Ҷамоати деҳоти Хурмии шаҳри Панҷакент ба кишти шолӣ оғоз намуданд

ДУШАНБЕ, 24.04.2023 /АМИТ «Ховар»/. Кишоварзони хоҷагиҳои деҳқонии Ҷамоати деҳоти Хурмӣ дар Панҷакент нахустин шуда, ба кишти шолӣ оғоз карданд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Панҷакент хабар медиҳад.

Ба ин муносибат дар Кооперативи тиҷоратии тухмипарварии ба номи Шамсӣ Назаров бо иштироки роҳбарияти  шаҳр, кишоварзони собиқадор, раисони хоҷагиҳои деҳқонӣ ва шолипарварон ҷамъомад баргузор шуд.

Таъкид гардид,  ки заминҳои соҳили дарёи Зарафшон барои рӯёнидани ҳосили баланди шолӣ мувофиқ буда, ҳар сол домани заминҳои кишти шолӣ дар ин ҷо бо дастгирии мақомоти иҷроияи  ҳокимияти давлатии шаҳр, ҷалби соҳибкорон ва деҳқонон, вусъати корҳои соҳилбандӣ васеъ карда мешавад ва ин кор ҳоло, ки сатҳи оби дарё паст аст, бояд идома дода шавад.

Зимнан, имсол дар хоҷагиҳои кишоварзӣ ва инфиродии Ҷамоати деҳоти Хурмӣ дар майдони 400 гектар, дар маҷмуъ дар шаҳр дар 2500 гектар шолии навъҳои «Нукус», «Регар», «Девзира», «Саразм», «Панҷруд» ва ғайра кишт карда мешавад.

Деҳқонон дар парвариши ин зироат таҷрибаи ғанӣ доранд ва соли гузашта ба ҳисоби миёна аз ҳар гектар 64,2-сентнерӣ ҳосил гирифтанд. Боздеҳи майдонҳои шолиро кишоварзони кордида ба 75-80-сентнерӣ мерасонанд.

Ба кишоварзон дар оғози кишт намунаи тухмии навъҳои серҳосили шолӣ, заҳрдоруҳо барои нест кардани алафҳои бегона ва касалиҳои ин зироат пешниҳод карда шуд.

АКС:  Мақомоти иҷроияи ҳокимияти давлатии шаҳри Панҷакент