ФУТБОЛ. Имрӯз бозиҳои даври сеюми Чемпионати Тоҷикистон байни дастаҳои Лигаи олӣ оғоз мешавад

ДУШАНБЕ, 11.04.2023 /АМИТ «Ховар»/. Имрӯз дар варзишгоҳҳои мамлакат бозиҳои даври  сеюми  Чемпионати Тоҷикистон оид ба футбол байни дастаҳои Лигаи олӣ оғоз шуда, то 12 апрел идома меёбад. Дар ин давр дастаҳои футболи  «Истиқлол»-и шаҳри Душанбе  бо  «Регар-ТадАЗ»-и шаҳри Турсунзода,  «Файзканд»-и ноҳияи Восеъ  бо    «Кӯктош»-и ноҳияи  Рӯдакӣ, «Эсхата»-и шаҳри Хуҷанд бо   «Хуҷанд»-и шаҳри Хуҷанд  ва  «Хатлон»-и шаҳри Бохтар  бо дастаи  «Равшан»-и  шаҳри Кӯлоб бозӣ мекунад.

Чанд рӯз пеш бозии охири даври дуюми  Чемпионати Тоҷикистон оид ба футбол байни  дастаҳои футболи  «Истиқлол»-и шаҳри Душанбе   ва «Файзканд»-и ноҳияи  Восеъ    дар варзишгоҳи марказии  шаҳри Душанбе  дар сатҳи баланд   баргузор гардида, бо ҳисоби 2 бар 1  ба нафъи мизбонон анҷом ёфа буд.   Голҳоро аз  ҳайати дастаи  «Истиқлол»  Манучеҳр Ҷалилов ду маротиба ва аз ҳайати дастаи футболи  «Файзканд»-и ноҳияи  Восеъ Билол Сулаймонов ба нишон расониданд. Беҳтарин бозингари  вохӯрӣ аз ҳайати дастаи  футболи «Истиқлол»-и шаҳри Душанбе Манучеҳр Ҷалилов эътироф гардид.

Хотиррасон мешавем, ки  6 апрел бо бозии дастаҳои футболи «Хатлон»-и шаҳри Бохтар бо «Эсхата»-и шаҳри Хуҷанд ва «Ҳосилот»-и ноҳияи Фархор бо «Кӯктош»-и ноҳияи Рӯдакӣ даври дуюми Чемпионати Тоҷикистон оид ба футбол байни дастаҳои Лигаи олӣ ба  анҷом  расид.

Вохӯрии дастаҳои футболи «Хатлон»-и шаҳри Бохтар  бо «Эсхата»-и шаҳри Хуҷанд дар Варзишгоҳи марказии шаҳри Ҳисор баргузор гардида, бо ҳисоби 0 бар 2 ба нафъи дастаи «Эсхата»-и шаҳри Хуҷанд хотима  ёфт. Голҳоро дар ҳайати дастаи «Эсхата» Мубинҷон Муминов ва Боҳирҷон Сангинбоев ба нишон расониданд.

Дар даври аввали Лигаи олӣ дастаи футболи «Эсхата»-и шаҳри Хуҷанд ба муқобили дастаи КМВА-и шаҳри Душанбе бо ҳисоби 3 бар 2 зафар ёфт. Дастаи футболи «Хатлон»-и шаҳри Бохтар дар меҳмонӣ дар шаҳри Турсунзода бо ҳисоби 0 бар 3 ноком гардид. Ҳамин тавр, дар даври сеюм мо шоҳиди бозии «дерби»-и вилоятҳои Суғд ва Хатлон мегардем.

Дар бозии дигари даври дуюми Лигаи олӣ дастаи футболи «Ҳосилот»-и ноҳияи Фархор дар сафар дастаи «Кӯктош»-и ноҳияи Рӯдакиро бо ҳисоби калони 3:0 шикаст дод. Голҳои дастаи футболи «Ҳосилот»-и ноҳияи Фархорро дар ин бозӣ Мусиси Фароук, Муродов ва Азизбоев ба нишон расониданд.

Дар ҷадвали мусобиқа  дастаи футболи  «Истиқлол»-и шаҳри Душанбе пас аз ин ғалаба бо касби 6  имтиёз ва тафовути тӯбҳо дар садри ҷадвали мусобиқа қарор гирифт.  Ҳамчунин дастаи  футболи  «Эсхата»-и шаҳри Хуҷанд  ҳам соҳиби 6 имтиёз буда, дар зинаи дуюм мавқеъ гирифтааст. Бояд гуфт, ки ҳоло беҳтарин нишонзани мусобиқа пас аз даври дуюм  Манучеҳр Ҷалилов  аз дастаи  футболи   «Истиқлол»-и шаҳри  Душанбе ва Бахтиёр Зарипов аз  дастаи  «Эсхата»-и шаҳри Хуҷанд  бо 3-голӣ  маҳсуб мешаванд.

Ёдовар мешавем, ки  Раёсати доварон ва нозирони Федератсияи футболи Тоҷикистон доварон ва нозирони бозиҳои даври сеюми мусобиқаи Чемпионати Тоҷикистон-2023 байни дастаҳои Лигаи олиро, ки 11-12 апрел баргузор мешаванд, таъйин кард.

Чемпионати Тоҷикистон-2023

Лигаи олӣ. Даври 3

11 апрел (сешанбе)

Оғоз – соати 16:00

«Ҳосилот» – КМВА

Довари марказӣ: Насрулло Кабиров (Норак).

Ёварон: Хусрави Сиддиқзод (Душанбе), Ҳасан Каримов (Норак).

Довари эҳтиётӣ: Қурбонмурод Шарифов (Ҳисор).

Нозири доварон: Юсуф Ишматов (Бохтар).

Комиссари бозӣ: Асрор Шораҷабов (Душанбе).

Фархор, Варзишгоҳи марказӣ

11 апрел (сешанбе)

Оғоз – соати 16:00

«Файзканд» – «Кӯктош»

Довари марказӣ: Бахтиёр Комилов (Кӯлоб).

Ёварон: Сорбон Аҳмадзода, Тоҳири Баҳром (ҳарду аз Кӯлоб).

Довари эҳтиётӣ: Наврӯз Воҳидов (Вахш).

Нозири доварон: Рустам Абдуллоев (Душанбе).

Комиссари бозӣ: Пӯлод Қодиров (Душанбе).

Рӯдакӣ, варзишгоҳи «Нефтяник»

12 апрел (чоршанбе)

Оғоз – соати 16:00

«Регар-ТадАЗ» – «Истиқлол»

Довари марказӣ: Амирҷон Хоркашев (Душанбе).

Ёварон: Исмоил Нуралиев (Норак), Ҷӯрабек Содиқов (Варзоб).

Довари эҳтиётӣ: Сайёдҷон Зайниддинов (Душанбе).

Нозири доварон: Равшан Ишматов (Кӯшониён).

Комиссари бозӣ: Раҳмон Муртазоев (Душанбе).

Турсунзода, варзишгоҳи «ТАЛКО-Арена»

12 апрел (чоршанбе)

Оғоз – соати 16:00

«Эсхата» – «Хуҷанд»

Довари марказӣ: Хуршед Дадобоев (Хуҷанд).

Ёварон: Акмал Бӯриев (Турсунзода), Насимҷон Мансуров (Бобоҷон Ғафуров).

Довари эҳтиётӣ: Абдулло Давлатов (Шаҳринав).

Нозири доварон: Ориф Ҷӯраев (Душанбе).

Комиссари бозӣ: Шавкат Ахмедов (Душанбе).

Хуҷанд, Варзишгоҳи «Спартак»

12 апрел (чоршанбе)

Оғоз – соати 16:00

«Равшан» – «Хатлон»

Довари марказӣ: Беҳрӯз Муртазоев (Душанбе).

Ёварон: Холмурод Абдусаломов, Ғайрат Рӯзибоев (ҳарду аз Шаҳринав).

Довари эҳтиётӣ: Рустам Нурматов (Душанбе).

Нозири доварон: Сафармаҳмад Шоймардонов (Хуросон).

Комиссари бозӣ: Сӯҳроб Ҳамидов (Рӯдакӣ).

Кӯлоб, Варзишгоҳи марказӣ

Меҳрони ҚУРБОН,
АМИТ «Ховар»        

АКС: Федератсияи футболи Тоҷикистон