Дар ноҳияи Роштқалъа шумораи коргоҳҳои хурди ресандагию бофандагӣ зиёд карда мешавад

Май 14, 2023 16:26

ХОРУҒ, 14.05.2003. /АМИТ «Ховар»/.  Шумораи корхонаҳои хурди ресандагию бофандагӣ дар деҳаи дурдасти Сежди ноҳияи Роштқалъаи Вилояти Мухтори Кӯҳистони Бадахшон ба чаҳор адад расид. Дар ҳар яке аз ин корхонаҳо аз 15 то 20 нафар занони ҳунарманди деҳа кор карда, аз пашми бузи тибетӣ ва гӯсфандҳои маҳаллӣ маҳсулоти гуногун тавлид мекунанд. Дар ин хусус мухбири минтақавии АМИТ «Ховар» Файз Мирасан хабар додааст.

Раҳима Шириншоева,  коргари яке аз ин коргоҳҳои хурд гуфт, ки  “ҳоло таваҷҷуҳи занону духтарони ҳунарманд ба    эҳёи ҳунарҳои мардумӣ бамаротиб афзудааст. Тавассути таъсиси коргоҳҳои хурди ҳунармандӣ дар як деҳаи мо зиёда аз 70 зану духтари бешуғл бо ҷойи кор таъмин шуд. Аксари занон қаблан низ дар хона ба ресандагию бофандагӣ машғул буданд ва аз ин ҳисоб ризқу рӯзии худро пайдо менамуданд, аммо ин ҷо шароит барои эҷоди ҳар гуна ҳунарҳои дастӣ хеле мусоид аст. Аз сӯи дигар, вақти мо низ хеле хуш мегузарад. Маъмурияти коргоҳ маҳсулоти моро ба фурӯш мегузорад ва моҳонаи моро сари вақт пардохт менамояд”.

Яке аз дигар занони ҳунарманди ин коргоҳ Дунёбегим Худодова, ки солҳои зиёд ба ресандагию бофандагӣ машғул аст, бунёди чунин коргоҳҳоро барои деҳотиён хеле муҳим мешуморад ва мегӯяд, ки “аксари сокинони деҳот аз ҳисоби фурӯши пашми чорвояшон  соҳиби маблағ мегарданд. Аз ин рӯ соҳаи чорводорӣ, ки чанд даҳсола пеш дар ҳоли рукуд буд, дубора рӯ ба тараққӣ овард. Ҳунари мардумӣ беҳтарин навъи санъату фарҳанг аст ва ба ҳаёт, кору рӯзгори мардум робитаи қавӣ дорад. Ин ҳунарҳои аз аҷдодон ба меросмонда ҳамеша аз эҳсоси баланди зебоипарастии миллати мо башорат медиҳанд ва таваҷҷуҳи зиёди сайёҳони хориҷиро низ ба худ ҷалб мекунанд. Аз нисф бештари маҳсулоти мо ба хориҷи мамлакат фурӯхта мешавад”.

Як анъанаи хуби ин коргоҳҳо боз он аст, ки бо хонандагони муассисаҳои таълимии деҳоти атроф робита барқарор намуда, пас аз дарс ба онҳо ҳунари ресандагию бофандагиро ёд медиҳанд.

АКС: АМИТ «Ховар»

Май 14, 2023 16:26

Хабарҳои дигари ин бахш

Тоҷикистону Булғористон хостори тақвияти ҳамкорӣ дар соҳаи саноат ва технологияҳои муосир шуданд
Вазири саноати Тоҷикистон бо намояндагони ширкатҳои пешрафтаи байналмилалӣ дар соҳаи зеҳни сунъӣ мулоқот намуд
Тавсеаи ҳамкории Тоҷикистон ва Чин дар соҳаи саноат баррасӣ гардид
Дар семоҳаи якуми соли 2025 дар Тоҷикистон 159 корхона аз фаъолияти истеҳсолӣ боз мондааст
Президенти Ҷумҳурии Тоҷикистон Эмомалӣ Раҳмон дар ноҳияи Данғара корхонаи навбунёди ҶДММ «Оксус Интеразия»-ро мавриди баҳрабардорӣ қарор доданд
Сарвари давлат Эмомалӣ Раҳмон дар ноҳияи Данғара ба сохтмони марҳилаи дуюми корхонаи ҶДММ «Сипар Групп» санги асос гузоштанд
Пешвои миллат Эмомалӣ Раҳмон дар ноҳияи Данғара ба бунёди коргоҳи дару тиреза ва панелҳои алюминии ҶДММ «Куруши Кабир Индастри» санги асос гузоштанд
Сарвари давлат Эмомалӣ Раҳмон бо фаъолияти ҶДММ «Акиа Авесто автоматив индастри» шинос шуданд
Дар Душанбе ҷаласаи XI Шуро оид ба сиёсати саноатии кишварҳои иштирокдори ИДМ баргузор мегардад
Дар Тоҷикистон ҳаҷми истеҳсоли қолин афзоиш ёфтааст
Таҳкими ҳамкории дуҷониба дар бахшҳои саноат ва воридоти технологияҳои нав бо намояндагони BVMW баррасӣ гардид
Дар шаҳри Панҷакент коргоҳи дӯзандагии «Маҳсул» ба фаъолият оғоз намуд