Дар ноҳияи Шаҳристон барои парвариш ва афзоиши саршумори оҳу мамнуъгоҳ таъсис дода шуд

ДУШАНБЕ, 14.05.2023 /АМИТ «Ховар»/. Дар ноҳияи Шаҳристон дар масоҳати 15 гектар мамнуъгоҳ таъсис ёфт, ки ба парваришу зиёд намудани саршумори оҳу мусоидат менамояд, хабар медиҳад АМИТ «Ховар» бо истинод ба Хадамоти матбуоти Раиси вилояти Суғд.

Мамнуъгоҳ аз ҷониби соҳибкорони маҳаллӣ ташкил карда шуда, дар он 30 сар оҳуи навъи лама нигоҳдорӣ мешавад. Атрофи мамнуъгоҳ пурра симтӯр кашида шуда, барои муҳофизати оҳувон нозирон фаъолият мебаранд.

Зимни боздиди Раиси вилоят аз ин мамнуъгоҳ таъкид карда шуд, ки Шаҳристон дорои табиати нотакрор буда, бояд барои ҷалби сайёҳон аз иқтидори бузурги табиӣ истифода бурда шавад. Фаъолияти муназзами мамнуъгоҳ низ метавонад ба рушди соҳаи сайёҳӣ мусоидат намояд.

Ба масъулини Хоҷагии ҷангали ноҳияи Шаҳристон дастур дода шуд, ки барои зиёд намудани саршумори оҳу ва назорати доимии онҳо чораҷӯӣ карда шавад.

АКС: Хадамоти матбуоти Раиси вилояти Суғд