ХАТЛОН, 31.05.2023 /АМИТ «Ховар»/. 30 май дар вилояти Хатлон бо ибтикори роҳбарияти мақомоти иҷроияи ҳокимияти давлатии вилоят ва бо мақсади дар сатҳи баланд истиқбол намудани Рӯзи байналмилалии ҳифзи кӯдакон (1 июн) моҳвораи «Як моҳи ҳаёти кӯдакон» эълон гардид. Дар заминаи он баробари ба роҳ мондани  силсилабарномаҳои фарҳангӣ, фароғатӣ ва  варзишӣ машғулияти омӯзишӣ ҳамчун тадбири муҳими иҷтимоӣ татбиқ мегардад. Дар ин хусус мухбири минтақавии АМИТ «Ховар»  хабар додааст.

Дар доираи чунин иқдоми муҳим муовини раиси вилоят Фирӯза Шарифӣ ва муовини аввали Вазири адлияи Ҷумҳурии Тоҷикистон Нигина Ализода аз шуъбаи таваллудии Беморхонаи марказии шаҳри Бохтар боздид намуданд.

Тавре дар Мақомоти иҷроияи ҳокимияти давлатии вилояти Хатлон иттилоъ доданд, зимни шиносоӣ бо шароити хизматрасонии тиббӣ дар шуъбаи таваллуд аз ҷониби роҳбарияти мақомоти иҷроияи ҳокимияти давлатии вилоят ба гуруҳе аз тифлакони навзод туҳфаҳо тақдим гардид.

Ҳамзамон аз ҷониби бахши сабти асноди ҳолати шаҳрвандӣ ба кӯдакони навзод ба таври ройгон шаҳодатномаи  таваллуд супорида шуд.

АКС: Мақомоти иҷроияи ҳокимияти давлатии вилояти Хатлон