Муштзани тоҷик Баҳодур Усмонов дар Чемпионати ҷаҳон оид ба бокс ба даври сеюм баромад

ДУШАНБЕ, 05.05.2023 /АМИТ «Ховар»/. Дар шаҳри Тошканди Ҷумҳурии Узбекистон Чемпионати чаҳон оид ба бокс идома дорад. Дар рӯзи чоруми мусобиқа Ҷумҳурии Тоҷикистонро дар Чемпионати ҷаҳон оид ба бокс 3 муштзан — Меҳрон Шафиев дар вазни то 48 кг, Баҳодур Усмонов дар вазни 63,5 кг ва Муҳаммад Аброриддинов дар вазни +92 кг намояндагӣ намуданд. Дар ин бора шореҳи варзиш Муродалӣ Тешаев ба мухбири АМИТ «Ховар» хабар дод.

Меҳрон Шафиев ва Муҳаммад Аброриддинов аз намояндагони Ҳиндустон шикаст хӯрданд ва аз идомаи мусобиқа бенасиб монданд.

Баҳодур Усмонов дар даври дуюм бар рақибаш аз Урдун – Муҳаммад Алкасба бо қарори якдилонаи доварон бо натиҷаи 3 бар 0 пирӯз шуда, ба даври баъдӣ баромад.

Хотиррасон мешавем, ки имрӯз ду муштзани дигари тоҷик рақобатҳояшонро дар Чемпионати ҷаҳон доир мекунанд. Асрор Воҳидов дар вазни 57 кг дар даври дуюм бо Руҷоберто Армандо аз Мозамбика ва Давлат Болтаев дар вазни 92 кг дар даври якум бо Садам Магомедов аз Сербия рақобат менамоянд.

Давоми чор рӯзи Чемпионати ҷаҳон оид ба бокс дар шаҳри Тошканд муштзанони тоҷик Меҳрон Шафиев дар вазни то 48 кг, Абубакр Муродзода дар вазни 60 кг, Довуд Маҳкамов дар вазни 71 кг, Шаббос Негматуллоев дар вазни 80 кг ва Муҳаммад Аброриддинов дар вазни +92 кг шикаст хӯрда, аз идомаи мусобиқа бенасиб монданд.

Бояд гуфт, ки фонди умумии ҷоизаҳо дар Чемпионати ҷаҳон оид ба бокс дар байни мардҳо 5,2 миллион долларро ташкил медиҳад. Ғолибони ҷойи аввал дар ҳамаи вазнҳо 200 000 доллари ИМА, барандагони медали нуқра 100 000 ва барандагони медали биринҷӣ 50 000 доллари ИМА дарёфт хоҳанд кард.

АКС аз манбаъҳои боз