Беш аз 20 корхонаи нассоҷӣ ва дӯзандагии Тоҷикистон аз «UzTextile Expo Spring» боздид намуд

Июнь 1, 2023 10:15

ДУШАНБЕ, 01.06.2023 /АМИТ «Ховар»/. Ҳайати Тоҷикистон дар Намоишгоҳи байналмилалии нассоҷӣ ва мӯди «UzTextile Expo Spring» робитаҳои мустақими тиҷоратӣ барқарор намуда, имконияти ҳамкориро тавсеа дод. Дар ин хусус ба АМИТ «Ховар» дар Маркази тиҷорати байналмилалӣ (МТБ) иттилоъ доданд.

Намоишгоҳ аз 29 то 31 май дар шаҳри Тошканд баргузор гардида, дар он намояндагони 23 корхонаи нассоҷӣ ва дӯзандагии Тоҷикистон барои омӯзиши равандҳои нав, харидории маводи хоми зарурӣ,  ба монанди риштаи омехта, аксессуарҳо ва барқарор кардани робитаҳои нави тиҷоратӣ дар намоишгоҳ иштирок намуданд.

«UzTextile Expo»  намоишгоҳи байналмилалии нодир ва махсуси соҳаи нассоҷӣ ва мӯд дар Осиёи Марказӣ буда, ҳар сол аз он бештар аз 9000 коршинос, соҳибкор ва тоҷир боздид мекунад. Дар намоишгоҳ дастовардҳои соҳаи нассоҷӣ ва мӯд аз истеҳсолкунандагони пешсафи ҷаҳонӣ дар тамоми занҷираи истеҳсолот – аз нахи пахта то либоси тайёр ба маъраз гузошта мешавад. Чорабинӣ ҷиҳати дарёфти шарикон дар Узбекистон- бозори калонтарини Осиёи Марказӣ бо бештар аз 34 миллион харидор кумак мекунад.

Муовини мудири ширкати «Business Consulting Group» Ардашер Иброҳимов гуфт, ки намоишгоҳи Тошканд макони ихтирооти инноватсионие аст, ки ба соҳаи дӯзандагӣ илҳом мебахшад. Ширкатҳои мо имкон пайдо карданд, то бо истеҳсолкунандагони пештози маҳсулоти нассоҷӣ аз минтақа вохӯранд, бренди худро дар бозори минтақавӣ тақвият диҳанд, бо ширкатҳои истеҳсолӣ, воридотӣ ва тоҷирон робита барқарор кунанд, бо талаботу интизориҳои бозор ва равандҳои ҷорӣ дар он шинос шуда, барои худ маҳсулоти нав ва навовариҳоро кашф созанд.


Ҳайати Тоҷикистон ҳамчунин аз барномаи васеи тиҷоратӣ, ба монанди ҳамоишу вохӯриҳои тиҷоратӣ, намоишҳои мӯд, мастер-классҳо аз ҷониби тарроҳони маъруф ва коршиносони соҳа ва ғайра баҳра бардошт. Соҳибкорони тоҷик дар яклухтфурӯшиҳо ва шоу-форумҳои ширкатҳо ва тоҷирони маҳаллӣ дар шаҳр ва вилояти Тошканд имконияти ҳамкорӣ ҷустуҷӯ намуданд.

Мудири ширкати «Ортекс» Абдурозиқ Орипов мегӯяд, ки иштирок дар ин намоишгоҳ бароямон хеле ҳам муфид буда, он имкони хубе фароҳам овард, то мо бо харидорони эҳтимолӣ робитаҳои мустақим барқарор намоем ва бозори фурӯш ва хариди ашёи хомро васеътар созем. Дар намоишгоҳ иттилооти зиёди зарурӣ  доир ба трендҳои замонавии соҳа низ дарёфт кардем.

Иштироки ҳайати Тоҷикистон дар намоишгоҳҳои байналмилалӣ барои корхонаҳои нассоҷӣ ва дӯзандагӣ ҷиҳати рақобатпазирии бештар дар бозорҳои минтақавӣ, барқарор кардани робитаҳои нави тиҷоратӣ, дарёфти маълумоти нав доир ба соҳа ва талаботи бозори ҷаҳонӣ имконоти фаровон фароҳам меорад.

Боздид аз  намоишгоҳи Тошканд барои ҳайати Тоҷикистон бо  ибтикори муштараки МТБ ва GIZ дар ҳамоҳангӣ бо Вазорати саноат ва технологияҳои нави Ҷумҳурии Тоҷикистон сурат гирифт.

АКС: Маркази тиҷорати байналмилалӣ

Июнь 1, 2023 10:15

Хабарҳои дигари ин бахш

Сарвазири мамлакат Қоҳир Расулзода дар ноҳияи Дӯстӣ бо рафти ҷамъоварии ҳосили пахта ва корҳои созандагӣ шинос гардид
Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
Дар Неругоҳи барқи обии «Роғун» роботи махсуси кафшерӣ ба истифода дода шуд
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид
Дар Чин масъалаи вазъи заминҳои шӯр ва ишқордор баррасӣ шуд
Ангури хуштаъми Тоҷикистон дар бозорҳои шаҳри Самара ба фурӯш гузошта шудааст