Дар Донишгоҳи давлатии Кӯлоб масоили муҳими таъмини амнияти иқтисодии Тоҷикистон ва кишварҳои ҷаҳон баррасӣ гардид

ДУШАНБЕ, 12.06.2023. /АМИТ «Ховар»/. Дар Донишгоҳи давлатии Кӯлоб ба номи Абуабдуллоҳи Рӯдакӣ Конфронси байналмилалии илмӣ-назариявӣ дар мавзӯи «Масоили муҳими таъмини амнияти иқтисодии Тоҷикистон ва кишварҳои ҷаҳон дар шароити муосир» баргузор шуд, ки мақсад аз он ҷалби олимон ва мутахассисон оид ба таҳқиқи масоили муҳими таъмини амнияти иқтисодӣ, таҳлили вазъи имрӯза ва пешниҳоди роҳҳои пешгирии таъсири хавфҳои эҳтимолӣ ба он мебошад. Дар ин хусус ба АМИТ «Ховар» дар Донишгоҳи мазкур хабар доданд.

Гуфта шуд, ки таъсири рушди иқтисодии кишварҳои ҷаҳон ба рушди иқтисоди миллии мамлакати мо беандоза назаррас аст. Тавре маълум аст, иқтисодиёти Тоҷикистон дар замони соҳибистиқлолии давлатӣ дар асоси сиёсати давлатии «дарҳои кушода» ба иқтисоди ҷаҳонӣ ва низоми ҳамгироии минтақавӣ ворид шуда, айни ҳол роҳи пайгиронаи табаддулоти иқтисоди бозориро пеш гирифтааст.

Дар кори конфронс зиёда аз 130 мақолаҳои илмии олимон ва коршиносон аз Иёлоти Муттаҳидаи Амрико, Русия, Миср, Узбекистон ва минтақаҳои Ҷумҳурии Тоҷикистон пешниҳод гардида, тавассути ҳузурӣ ва маҷозӣ баргузор шуд.

АКС: Донишгоҳи давлатии Кӯлоб ба номи Абуабдуллоҳи Рӯдакӣ