ЭЙ ХУШО, ҶАШНИ ТИРГОН ОМАД! Онро шоирон баҳри эҳтироми об ва баракату фаровонӣ васф менамоянд

ДУШАНБЕ, 24.06.2023. /АМИТ «Ховар»/. Пагоҳ, якшанбеи охири моҳи июн дар Тоҷикистон ҷашни Тиргон баргузор мегардад. Мояи ифтихор аст, ки дар даврони соҳибистиқлолӣ бо иқдомҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва талошҳои Ҳукумати мамлакат арзишҳои миллии мардуми тоҷик умри дубора пайдо намуда, он ганҷҳои пурбаҳои миллӣ, ки дар ганҷури таърих ба фаромӯшӣ афтода буданд, эҳё ва бо шаклу мазмуни нав ба ҳаёти мардуми мамлакат рангорангӣ бахшиданд.

Тиргон аз ҷумлаи ҷашнҳои қадимаи аҷдодони тоҷикон маҳсуб меёбад. Онро мардум ба нишонаи эҳтироми об ва баракату фаровонӣ таҷлил мекардаанд ва ин ҷашн дар қатори Наврӯзу Меҳргон ва Сада аз куҳантарин ҷашнҳои мардумони ориёитабор ба шумор меравад. Ҷашни Тиргон мавсими расиши гандум, ҷашни обу ободонӣ, ҷашни удабо ва уламо аст. Аз ҷумла, шоири муосири тоҷик Муҳиддин Шоҳин ин ҷашнро чунин васф намудааст:

ТИРГОН – ҶАШНИ ОБ

Эй хушо, ҷашни Тиргон омад,
Мужда аз аҳди бостон омад.

Ҷашни об асту ҷашни борон аст,
Ҷашни меросии ниёгон аст.

Пешво кард эҳё онро,
Гуфт инро зи минбари воло.

Обро шуҳраи ҷаҳонӣ дод,
Ҷашнро арши осмонӣ дод.

Обро ҷамъ карду гардон кард,
Хонаи мардумаш чароғон кард.

Тиргон мазҳари Ватандорист,
Ҷашни ободиву накукорист.

Чунки марзи Ватан намуд аён,
Ораши паҳлавон ба қиммати ҷон.

АКС аз манбаъҳои боз