ИСТИФОДАИ САМАРАНОКИ ЗАМИН. Деҳқонони ноҳияи Ҷайҳун пас аз ҷамъоварии ҳосил ба кишти такрории маҳсулоти кишоварзӣ шуруъ менамоянд

ДУШАНБЕ, 17.06.2023. /АМИТ «Ховар»/. Дар хоҷагии деҳқонии «Сайёд» — и ноҳияи Ҷайҳун дар майдони 1,30 га кишти зироати полезӣ, аз ҷумла тарбуз ва ҳандалак гузаронида шуда, дар давраи ҷамъоварии ҳосил қарор дорад, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии вилояти Хатлон.

Деҳқонони хоҷагии мазкур иброз доштанд, ки дар ҷамъоварӣ ва фурўши тарбузу ҳандалак хеҷ мушкилӣ надоранд. Зеро соҳибкорон онро аз сари замин, ҳамон лаҳзаи баъди ҷамъоварӣ ба мошинҳо бор намуда, барои фурўш ба бозорҳои дохил ва хориҷи мамлакат интиқол медиҳанд.

Ба гуфти кишоварзони ин хоҷагӣ, имсол ҳосили фаровони тарбузу ҳандалак ба даст овардаанд.

Мавриди тазаккур аст, ки хоҷагии деҳқонии «Сайёд», ки дар масоҳати 3,30 га замини обӣ ташкил гардидааст, дар майдони 1 га гандум кишт намуда, аз он ба ҳисоби миёна 45-48-сентнерӣ ҳосил ба даст овардааст.

Баъди ҷамъоварии гандум дар майдони мазкур кишти такрории сабзӣ гузаронида мешавад. Инчунин дар майдони 1 га кишти пахта гузаронида шудааст, ки нашъунамо дорад.

Дар хоҷагии деҳқонии ба номи Нуриддин Маҳмудови ин ноҳия бошад, баъди обёрӣ гардидани заминҳое, ки солҳои тӯлонӣ аз об танқисӣ мекашиданд, пас аз ҷамъоварии гандум ва ҷав дар майдони 50 га кишти такрории навъи пешпазаки пахта анҷом дода шуд.

АКС: Мақомоти иҷроияи ҳокимияти давлатии вилояти Хатлон