Тоҷикистон ва Қатар ҷиҳати рушди савдои биржа ва тиҷорати электронӣ ҳамкорӣ менамоянд

ДУШАНБЕ, 12.06.2023. /АМИТ «Ховар»/. Дар доираи сафари давлатии Амири Давлати Қатар Шайх Тамим ибни Ҳамад Олӣ Сонӣ ба Ҷумҳурии Тоҷикистон дар Душанбе Ёддошти тафоҳум байни Вазорати рушди иқтисод ва савдои Ҷумҳурии Тоҷикистон ва Вазорати тиҷорат ва саноати Давлати Қатар дар соҳаи тиҷорат ба имзо расид. Дар ин хусус ба «АМИТ» Ховар дар Вазорати рушди иқтисод ва савдои ҷумҳурӣ хабар доданд.

Санади мазкур бо мақсади фароҳам овардани шароити мусоид барои рушди тиҷорати дуҷониба дар асоси принсипҳои мутақобилан судманд дар самтҳои зерин аз ҷумла, табодули таҷриба дар соҳаи рушди савдои дохилӣ ва хориҷӣ, инкишоф ва пешбурди содироти молу хизматрасониҳои ғайримолӣ, беҳтар намудани инфрасохтори савдо, рушди савдои биржа ва тиҷорати электронӣ, мусоидат ба муколамаи байни сохторҳои давлатӣ, хусусӣ, муоширати корпоративӣ дар таълими кадрҳо, табодули таҷрибаи инноватсионӣ, ҳамкории корхонаҳои ҳар ду давлат, аз ҷумла осон намудани савдои молу маҳсулот зерин ҳамкориро ба роҳ хоҳанд монд.

Бояд тазаккур дод, ки дар доираи сафари давлатии Амири Давлати Қатар ба Ҷумҳурии Тоҷикистон дар маҷмӯъ 15 санади нави ҳамкорӣ дар соҳаҳои гуногун ба имзо расонида шуд, ки онҳо дар тақвияти ҳамкории Тоҷикистону Қатар нақши муассир хоҳанд гузошт.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»