Боғпарварони Кӯшониён ҳосили меваҳоро беталаф ҷамъ меоваранд

ДУШАНБЕ, 19.07.2023. /АМИТ «Ховар»/. Дар хоҷагиҳои деҳоти Сарвати Истиқлол ва Заргари ноҳияи Кӯшониёни вилояти Хатлон ҷамъоварии ҳосили боғҳо ҷараён дорад. Дар ин хусус АМИТ «Ховар» бо истинод ба Дафтари матбуоти Раиси ноҳияи Кӯшониён хабар медиҳад.

Боғпарварӣ дар ноҳия яке аз манбаъҳои сердаромад дар соҳаи хоҷагии халқ ба ҳисоб меравад. Имрӯзҳо аъзои кооперативи тиҷоратии «Беҳбудӣ» дар деҳаи Ганҷинаи Ҷамоати деҳоти Меҳнатободи ноҳияи Кӯшониён ба хушконидани меваҳо машғул мебошанд. Деҳқонони хоҷагии мазкур дар масоҳати 27,38 гектар дарахтони мевадиҳандаи себ, зардолу, олуболу, биҳӣ себ, нок ва шафтолу шинонидаанд.

Деҳқонон меваҳои навъи олуболу, себ, лимӯ, зардолу, хурмо ва биҳисебро хушконида, ғулинг карда, ба бозори истеъмолӣ содир намуда истодаанд.

Дар Коперативи тиҷоратии «Беҳбудӣ» ба кори самаранок истифода бурдани заминҳои хоҷагӣ низ аҳамияти аввалиндараҷа дода шуда, майдони зери дарахтон оқилона ва босамар истифода мешаванд.

Гуфта шуд, ки коркарди саривақтии боғҳо ва риояи талаботи агротехникӣ сабаби он гардидааст, ки ҳамарӯза ҳосили боғҳо ба бозорҳои вилоят, ҷумҳурӣ ва хориҷи мамлакат содирот мегардад.

Роҳбарияти ноҳия барои беталаф ҷамъ овардани ҳосили боғҳо ва нигоҳдории онҳо дар сардхонаҳои ноҳия ба масъулин супоришҳои мушаххас доданд.

София ШОИК,
АМИТ «Ховар»

АКС: Дафтари матбуоти Раиси ноҳияи Кӯшониён