Дар боғи Алишер Навоии Душанбе рӯзҳои фарҳанги шаҳри Ваҳдат баргузор шуд

ДУШАНБЕ, 04.07.2023. /АМИТ «Ховар»/. Масъулини Мақомоти иҷроияи ҳокимияти давлатии шаҳри Ваҳдат дар Боғи фарҳангӣ- фароғатии ба номи Мир Алишер Навоии шаҳри Душанбе Намоиш-фурӯши маҳсулоти кишоварзӣ, ҳунарҳои мардумӣ, таъомҳои миллӣ ва барномаҳои фарҳангиву адабиро пешкаши сокинону меҳмонони пойтахт гардониданд. Дар ин хусус ба АМИТ «Ховар» дар Мақомоти иҷроияи ҳокимияи давлатии шаҳри Душанбе хабар доданд.

Дар намоишгоҳ маҳсули ҳунарҳои дастӣ, аз қабилӣ зардӯзӣ, гулдӯзӣ, попурӣ, қўроқдўзӣ ва ғайра нақшу нигори миллӣ, кандакорӣ, кулолгарӣ, табақтарошӣ, заргарӣ, чӯбтарошӣ ва дигар дастовардҳои ташкилоту муассисаҳои шаҳр ва анвои гуногуни хӯроки миллӣ ба маърази тамошо гузошта шуданд.

Дар ин намоишгоҳ муовини Сарвазири Ҷумҳурии Тоҷикистон Сулаймон Зиёзода ва дигар намояндагони мақомати марбутаи мамлакат, масъулини Мақомоти иҷроияи ҳокимияти давлатии шаҳри Ваҳдат ва ноҳияи Шоҳмансури шаҳри Душанбе иштирок намуда, намоиш-фурӯши маҳсулоти кишоварзӣ, ҳунарҳои мардумӣ, таъомҳои миллии сокинони шаҳри Ваҳдатро тамошо карданд.

Дар гӯшаи дигари ин макон кишоварзони шаҳри Ваҳдат маҳсулоти кишоварзӣ, гуштӣ ва дигар анвои ниёзи мардумро бо нархҳои нисбат ба бозор арзон ба фурӯш гузоштанд.

Ҳамзамон, дар ин рӯз аз ҷониби санъаткорону ҳунармандони шаҳри Ваҳдат дар Боғи фарҳангу фароғати ба номи Мир Алишер Навоӣ барномаи фарҳангиву адабӣ доир гашт.

Дар оғози чорабинӣ муовини Раиси шаҳри Душанбе Сиҷоуддин Саломзода ба роҳбарияти Мақомоти иҷроияи ҳокимияти давлатии шаҳри Ваҳдат ҷиҳати дар пойтахт дар сатҳи баланд доир намудани Намоиш-фурӯши маҳсулоти кишоварзӣ, ҳунарҳои мардумӣ, таъомҳои миллӣ ва барномаҳои фарҳангиву адабии шаҳри Ваҳдат миннатдории роҳбарияти Мақомоти иҷроияи ҳокимияти давлатии шаҳри Душанберо расонид.

Ҳамзамон роҳбарияти Мақомоти иҷроияи ҳокимияти давлатии шаҳри Ваҳдат аз истиқболи самимии сокинони пойтахт ва боздид аз Намоиш-фурӯши маҳсулоти кишоварзӣ, ҳунарҳои мардумӣ, таъомҳои миллӣ ва барномаҳои фарҳангиву адабии шаҳри Ваҳдат ба сокинон изҳори миннатдорӣ намуданд.

Дар идомаи чорабинӣ «Сипоснома»-и Мақомоти иҷроияи ҳокимияти давлатии ноҳияи Шоҳмансури шаҳри Душанбе ба роҳбарияти Мақомоти иҷроияи ҳокимияти давлатии шаҳри Ваҳдат ба хотири дар сатҳи зарурӣ баргузор намудани ин чорабинӣ тақдим гардид.

Аҳли ҳунари шаҳри Ваҳдат бо иҷрои суруду таронаҳои тараннумгари Ватан- Модар, Тоҷикистон, пойтахти тоҷикон –Душанбе, сулҳу ваҳдат ва ғайра хотири иштирокчиён ва меҳмонону сокинони пойтахтро шод гардониданд.

Хотиррасон мешавем, ки шуруъ аз 1 июл то 3 сентябри соли равон дар боғҳои фарҳангӣ-фароғатии пойтахти мамлакат — шаҳри Душанбе шаҳру ноҳияҳои ҷумҳурӣ Намоиш-фурӯши маҳсулоти кишоварзӣ, ҳунарҳои мардумӣ, таъомҳои миллӣ ва барномаҳои фарҳангиву фароғатӣ баргузор менамоянд.

Вақти баргузории Намоиш-фурӯши маҳсулоти кишварзӣ ва таъомҳои миллӣ аз соати 8 то 11 ва намоиши ҳунарҳои мардумӣ ва барномаи фарҳангиву адабӣ аз соати 17:00 то 20:00 муқаррар карда шудааст.

АКС: Мақомоти иҷроияи ҳокимияти давлатии ноҳияи Шоҳмансури шаҳри Душанбе