Дар Душанбе мусобиқаи варзишӣ оид ба волейбол доир шуд

ДУШАНБЕ, 02.07.2023. /АМИТ «Ховар»/. Аз 26 то 30 июн мусобиқаи варзишии ҷумҳуриявӣ оид ба волейбол байни деҳаҳо ва маҳаллаҳои аҳолинишини ҷамоатҳои шаҳрак ва деҳоти шаҳру ноҳияҳои ҷумҳурӣ дар шаҳри Душанбе баргузор гардид. Дар ин хусус ба АМИТ «Ховар» дар Кумитаи кор бо ҷавонон ва варзиши ҷумҳурӣ хабар доданд.

Дар мусобиқаи мазкур ҳафт даста аз минтақаҳои шаҳру ноҳияҳои ҷумҳурӣ ҷалб гардида, байни ҳам рақобат намуданд.

Аз рӯи натиҷаҳои мусобиқа дастаи Хатлон-2 ҷойи якум, дастаи Файзобод ҷойи дуюм ва дастаи Душанбе ҷойи сеюмро соҳиб шуд.

Дар вазъияти тантанавӣ ба ғолибону ҷоизадорон ҷом, диплом ва мукофотҳои калони пулӣ тақдим карда шуд.

Ёдовар мешавем, ки ғолиби ҷойи якум бо маблағи 20 000 сомонӣ, ҷойи дуюм бо маблағи 15 560 сомонӣ ва ҷойи сеюм бо маблағи 10 000 сомонӣ ҳавасманд гардонида шуд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон