Сарвари давлат Эмомалӣ Раҳмон дар ноҳияи Мастчоҳ бинои иловагии Маркази ташхисию табобатии «Сино»-ро ифтитоҳ намуданд

Июль 7, 2023 11:43

ДУШАНБЕ, 07.07.2023. /АМИТ «Ховар»/. 7 июл Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ дар ноҳияи Мастчоҳ бо бардоштани парда аз рӯи лавҳаи рамзӣ ба фаъолияти бинои нави иловагии Маркази ташхисию табобатии “Сино” оғоз бахшиданд.

Бинои Маркази ташхисию табобатии “Сино” дар деҳоти Мастчоҳи ноҳияи Мастчоҳ бунёд шуда, аз 3 ошёна иборат мебошад. Дар таҳхонаи он 2 толори муосири варзишии табобатӣ, бойгонӣ ва ҷойи нигоҳдории ашёи мулоим ташкил карда шудааст. Ошёнаи якуми бино дорои 2 ошхона барои то 150 нафар, бахши табиатшифоӣ, ҳуҷраи кормандони тиб барои муоина ва дар ошёнаҳои дуюм ва сеюм бошад, ҳуҷраҳои доругузаронӣ, истироҳатӣ ҷойгир карда шудаанд.

Сохтмони бинои нав моҳи июни соли 2021 оғоз гардида, аз ҷониби бинокорони ватании Ҷамъияти дорои масъулияти маҳдуди “Фаворид” дар муддати 2 сол бо сатҳу сифати баланд сохта шудааст.

Ба Пешвои миллат муҳтарам Эмомалӣ Раҳмон иттилоъ дода шуд, ки дар бинои нав барои табобат ва истироҳати то 40 нафар дар як вақт шароити зарурӣ фароҳам оварда шудааст. Баҳри ташхиси дақиқ ва табобати саривақтии шаҳрвандон 5 намуди таҷҳизоти навӣ тиббӣ, амсоли рентгени рақамӣ, ташхиси ултрасадо, дастгоҳи автоматии умумии ташхиси хун ва дигар таҷҳизоту воситаҳои муосири тиббӣ харидорӣ гардида, имконияти ташхисию табобатӣ ва истироҳат ба замони муосир мутобиқ карда шудааст.

Бо бунёд ва мавриди истифода қарор додани бинои иловагӣ 12 нафар мутахассиси соҳаи тиб, дар маҷмӯъ, беш аз 100 нафар, аз ҷумла хатмкунандагони коллеҷу Донишгоҳи давлатии тиббии Тоҷикистон бо кор таъмин шуданд.

Дар ҳуҷраҳои истироҳатӣ рахти хоб бо матоъҳои миллӣ оро дода шуда, ҷевон ва мизу курсии нав мавҷуд мебошад ва барои тамошои шабакаҳои телевизионии Ҷумҳурии Тоҷикистон имконият фароҳам мебошад.

Дар Маркази ташхисию табобатии “Сино” дар ноҳияи Мастчоҳ табобат бо усулҳои маъмули тиббӣ, табиатшифоӣ, сӯзандармонӣ, маҳси дастии барқӣ, лазерӣ сурат гирифта, ташхису табобати бемориҳои системаи ҳаракату такягоҳ, асаб, амрози дарунӣ дар умум 25 номгӯи табобат анҷом дода мешавад.

Сарвари давлат муҳтарам Эмомалӣ Раҳмон ба бунёди бинои наву замонавӣ, фароҳам овардани шароти ҷавобгӯ ба замони муосир, имконияту зарфияти фароҳамгардида баҳри ташхису табобат ва истироҳат баҳои баланд доданд.

Зимни суҳбат бо кормандони Маркази ташхисию табобатии “Сино” дар ноҳияи Мастчоҳ истифода аз имконият, муоширати хуб бо истироҳаткунандагон ва ҷалби мутахассисони ҷавони соҳаи тиб ба кор дастуру супоришҳои муфид  доданд.

Роҳбарият ва кормандони ин маркази табобатӣ ба Пешвои миллат муҳтарам Эмомалӣ Раҳмон ҷиҳати фароҳам овардани имконияти мусоид, дастгирии ҳамешагии намояндагони бахши хусусӣ, ки чунин фазою шароит омили рушди соҳа ва бунёди чунин муассисаҳои замонавӣ гардидааст, сипосу миннатдории хешро баён доштанд.

Дар доираи дастгириҳои Ҳукумати Ҷумҳурии Тоҷикистон, рушди мамлакат, фазои хуби соҳибкорӣ ва иҷрои дастуру ҳидоятҳои Пешвои миллат муҳтарам Эмомалӣ Раҳмон соҳибкор, муассиси ин маркази ташхисию табобатӣ Боймаҳмад Султонов иқдом намуд, ки баҳри таъмини талаботи аҳолӣ бо бунёди бинои нав фаъолиятро васеъ намояд.

Ифтитоҳи бинои иловагии Маркази ташхисию табобатии “Сино” дар ноҳияи Мастчоҳ 07.07.2023

Июль 7, 2023 11:43

Хабарҳои дигари ин бахш

Озмуни «Роғун – нурбахши роҳи фардои Ватан» баргузор мегардад
35-СОЛАГИИ ИСТИҚЛОЛИ ДАВЛАТӢ. Дар 25 иншооти ҷашнии ноҳияи Тоҷикобод корҳои сохтмонӣ идома доранд
Суханронии Президенти Ҷумҳурии Тоҷикистон Эмомалӣ Раҳмон дар Конфронси СММ оид ба уқёнус
Сарвари давлат Эмомалӣ Раҳмон бо иштирокдорони Конфронси Созмони Милали Муттаҳид оид ба уқёнус суҳбатҳо анҷом доданд
Президенти Ҷумҳурии Тоҷикистон Эмомалӣ Раҳмон дар Конфронси СММ оид ба уқёнус иштирок намуданд
Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Фаронса Эммануэл Макрон мулоқот намуданд
Дар Бохтар бинои нави Беморхонаи бемориҳои дил ва маркази эндокринология сохта мешавад
Президенти Ҷумҳурии Тоҷикистон Эмомалӣ Раҳмон бо Сарвазири Шоҳигарии Камбоҷа Ҳун Манет мулоқот намуданд
Президенти Ҷумҳурии Тоҷикистон Эмомалӣ Раҳмон дар чорабинии сатҳи баланди оғози Даҳсолаи байналмилалии амал оид ба илмҳои яхшиносӣ (криосферӣ), солҳои 2025-2034 иштирок ва суханронӣ намуданд
Президенти Ҷумҳурии Тоҷикистон Эмомалӣ Раҳмон бо сафари корӣ вориди шаҳри Нитсаи Ҷумҳурии Фаронса шуданд
35-СОЛАГИИ ИСТИҚЛОЛИЯТИ ДАВЛАТӢ. Дар Варзишгоҳи миллии Тоҷикистон зиёда аз 30 ҳазор ҷойи нишаст пешбинӣ шудааст
Президенти Ҷумҳурии Тоҷикистон Эмомалӣ Раҳмон ба Ҷумҳурии Фаронса сафар намуданд