Универсиадаи 31-уми ҷаҳонии тобистона дар шаҳри Чэндуи Чин баргузор мешавад

ДУШАНБЕ, 19.07.2023 /АМИТ «Ховар»/. Аз 28 июл то 8 август дар шаҳри Чендуи Чин Универсиадаи 31-уми ҷаҳонии тобистона баргузор мегардад, иттилоъ медиҳад АМИТ «Ховар» бо истинод ба «Жэнмин жибао».

Ба иттилои ин манбаъ, маркази асосии расонаии Универсиада дар Чэнду расонаҳои ҷаҳониро бо зерсохтор ва хизматрасонии зарурӣ, яъне офисҳо, ғизо, ҳамлу нақл, хизматрасонии тиббӣ ва барномаҳои фароғатӣ таъмин менамояд.

Пас аз ифтитоҳи расмӣ маркази асосии расонаӣ якчанд чорабинии гуногун дар бораи мероси фарҳангии ғайримоддӣ, ба монанди намоиши парчаи Сичуан ва дӯзандагӣ, маснуоти бо тасмаҳои бамбук печонида, расмҳои карамелии «танхуа», инчунин намоиши «гунфуча» (тарзи дам намудани чой) — ро баргузор мекунад.

Ин чорабиниҳо ба рӯзноманигорон аз тамоми ҷаҳон имкон медиҳанд, ки ҷозибаи беназири фарҳанги Ба — Шу (фарҳанги Сичуан) — ро беҳтар дарк намоянд.

Азиза ИКРОМ,
АМИТ «Ховар»

АКС: «Жэнмин жибао»