ҲУШДОР: 14-15 июл дар Тоҷикистон хокбориш дар назар аст

ДУШАНБЕ, 10.07.2023. /АМИТ «Ховар»/. 14-15-уми июли соли равон дар ҷумҳурӣ бар асари шиддат гирифтани шамол аз самти ҷанубу шарқ бо суръати 13-18 метр дар як сония ба амал омадани гарду чанг ва  хокбориш дар назар дошта шудааст. Дар ин хусус ба АМИТ «Ховар» дар Агентии обуҳавошиноснии мамлакат хабар доданд.

Тавре иттилоъ дода шуд,  14-15 июли соли ҷорӣ дар вилоятҳои Хатлон, Суғд ва ноҳияҳои тобеи ҷумҳурӣ бо сабаби шиддатёбии вазиши шамол аз самти ҷанубу-ғарб бо суръати то 13-18 метр дар як сония, дар ноҳияҳои ҷанубӣ бо шиддатнокии то 20-25 метр дар як чония шиддатёбии тӯфони чангу ғубор пешгӯӣ мешавад.

Ҳамзамон дар ноҳияҳои ҷанубӣ ва марказии вилояти Хатлон, ноҳияҳои тобеи ҷумҳурӣ, шаҳри Душанбе ва ноҳияҳои шимолии вилояти Суғд баланд шудани ҳолати ифлосшавии ҳавои атмосфера аз моддаҳои муаллақ (чанг) дар назар дошта шудааст.

Ба иттилои агентӣ,  11-12 июл дар ноҳияҳои алоҳидаи ғарбии Вилояти Мухтори Кӯҳистони Бадахшон ва ноҳияҳои тобеи ҷумҳурӣ сар задани селҳои пиряхӣ аз эҳтимол дур нест.