Чемпиони ҷаҳон Ҷавоҳир Шодиев аз ҷониби раиси шаҳри Турсунзода қадрдонӣ гардид

ДУШАНБЕ, 08.08.2023. /АМИТ «Ховар»/. Раиси шаҳри Турсунзода ба чемпиони ҷаҳон Ҷавоҳир Шодиев аз номи мақомоти иҷроияи маҳаллии ҳокимияти давлатӣ ва сокинони  шаҳр  Ифтихорнома ва туҳфаҳои хотирмон тақдим намуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Турсунзода хабар медиҳад.

Ҷавоҳир Шодиеви 17-сола, сокини шаҳри Турсунзода ва дастпарвари мактаби варзишии шаҳри  мазкурдар Чемпионати ҷаҳон оид ба муҳорибаҳои омехта, ки аз 1 то 7 август дар шаҳри Абузабии  Аморати Муттаҳидаи Араб баргузор шуд, иштирок намуда, дар вазни 56 кг байни варзишгарони 46 давлати дунё унвони чемпиони ҷаҳонро сазовор гардид.

Ҷавоҳир дар рақобатҳои чандрӯза рақибони худро аз давлатҳои Амороти Муттаҳидаи Араб, Озарбойҷон ва Қазоқистонро шикаст дода, дар даври ниҳоӣ варзишгари украиниро мағлуб намуд ва сазовори медали тиллои чемпионати ҷаҳон гардид.

 АКС: Мақомоти иҷроияи ҳокимияти давлатии шаҳри Турсунзода