Дар ҷамоати Сайлиободои ноҳияи Лахш муассисаи таълимии замонавӣ ба истифода дода шуд

Сентябрь 8, 2023 19:29

ЛАХШ, 08.09.2023. /АМИТ «Ховар»/. Бахшида ба ҷашни 32-солагии Истиқлолияти давлатӣ  дар деҳаи Тоҷварони Ҷамоати деҳоти Сайлиободи ноҳияи Лахш бинои нави муассисаи таҳсилоти миёнаи умумии №56, ки  бо сифати баланди меъморӣ сохта шудааст, ба истифода дода шуд. Дар ин хусус ба хабарнигори минтақавии АМИТ «Ховар»  Субҳониддини Маҳмуд дар Мақомоти иҷроияи ҳокимияти давлатии ноҳияи Лахш  хабар доданд.

Бинои нави муассисаи таълимӣ дорои  9 синфхона буда, барои 150  нафар хонанда дар як баст пешбинӣ гардидааст.  Муассисаи мазкур бо маблағгузории давлати Ҷопон бунёд гардида, синфхонаҳои он бо таҷҳизоту ловозимоти зарурӣ муҷаҳҳаз гардонида шудаанд. Бо дастгирии Вазорати маориф ва илми Ҷумҳурии Тоҷикистон ҳамаи синфхонаи ин муассисаи наву замонавӣ бо мизу курсӣ таъмин гардиданд.

Дар маросими ба истифода додани мактаби мазкур Раиси ноҳияи Лахш Каромиддин Холзода ва Сафири Фавқулода ва Мухтори Ҷопон дар Ҷумҳурии Тоҷикистон Тошихиро Аики  иштирок намуданд.

Зимни кушодашавии муассисаи мазкур иброз гардид, ки бо дастгирии Ҳукумати Ҷумҳурии Тоҷикистон ва шарикони рушд ҳамасола дар қаламрави ноҳия  муассисаҳои таълимии ҷавобгӯ ба талаботи замон ба истифода дода мешаванд. Сол аз сол афзудани маблағгузорӣ ба соҳаи маориф ва таъмини шароити хуби меҳнатии омӯзгорон аз он дарак медиҳад, ки соҳаи маориф зери таваҷҷуҳи ҳамешагии Пешвои миллат муҳтарам Эмомалӣ Раҳмон қарор дорад. Имконияти мусоид ва дастгириву ғамхориҳо аҳли маорифро муваззаф месозанд, ки рисолати хешро иҷро намуда,  сатҳу сифати  дониши хонандагон ҷавобгӯ ба меъёрҳои замона гардад.

Мудири маорифи ноҳияи Лахш Шининмоҳ Шарифзода иброз дошт, ки «бо дастгирии Ҳукумати Ҷумҳурии Тоҷикистон, Мақомоти иҷроияи ҳокимияти давлатӣ, Вазорати маориф ва илми ҷумҳурӣ ва шарикони рушд барои мо, омӯзгорон дар арафаи ҷашни 32-солагии Истиқлолияти давлатӣ ду бинои нави муассисаҳои таълимии замонавӣ сохта, ба омӯзгорону хонандагони ноҳия туҳфа гардид.  Ин муассисаҳои таълимӣ дорои  утоқҳои фаннӣ, синфхонаи алоҳидаи компютерӣ, китобхона мебошанд,  ки хонандагону омӯзгорон аз он самаранок истифода менамоянд. Мо, омӯзгорон ҷавобан ба ин ғамхориҳои давлат кӯшиш менамоем, ки насли наврасро дар руҳияи ватандӯстию хештаншиносӣ тарбия намоем».

Бахшида ба ҷашни 32-солагии Истиқлолияти давлатӣ дар ноҳияи Лахш боз се иншооти дигар- толори варзишии деҳаи Майдонтираки Ҷамоати деҳоти Наврӯз, муассисаи таълимии №7-и деҳаи Меҳрободи Ҷамоати деҳоти Сайлиобод, иборат аз 9 синфхона ва мумфаршкунии 3 км роҳҳои маркази ноҳия ба истифода дода мешаванд.

Тибқи иттилои масъулини Мақомоти иҷроияи ҳокимияти давлатии ноҳияи Лахш,  бахшида ба 35-солагии Истиқлолияти давлатӣ бунёди 124 иншооти гуногун ба нақша гирифта шудааст. То ба имрӯз 31 иншоот мавриди баҳрабардорӣ қарор дода шуда, дар 93 иншооти дигар корҳои сохтмонӣ идома доранд.

АКС: Мақомоти иҷроияи ҳокимияти давлатии ноҳияи Лахш

Сентябрь 8, 2023 19:29

Хабарҳои дигари ин бахш

Ҳифзи истиқлолу озодии давлат ва миллат аз рушди илму маориф вобастагӣ дорад
Дар Тоҷикистон ба соҳаи сохтмон зиёда аз 16 миллиард сомонӣ сармоягузорӣ равона карда шудааст
Дар шаҳру ноҳияҳои Вилояти Мухтори Кӯҳистони Бадахшон ҳамоиши «Шукуҳи Истиқлол» баргузор гардид
Бо иштироки муовини Сарвазири Тоҷикистон дар Варзоб муассисаҳои таълимӣ ба истифода дода шуданд
Даври ниҳоии Озмуни ҷумҳуриявии «Омӯзгори сол-2025» оғоз гардид
Дар Женева 34-солагии Истиқлолияти давлатии Ҷумҳурии Тоҷикистонро ҷашн гирифтанд
35-СОЛАГИИ ИСТИҚЛОЛИ ДАВЛАТӢ. Барои кормандони соҳаи ҳифзи муҳити зист 4 бинои маъмурӣ ба истифода дода мешавад
Дар деҳаи Обидараи Даҳанаи шаҳри Ваҳдат бинои нави муассисаи таълимӣ ба истифода дода шуд
«365 РӮЗИ ОБОДОНӢ». Дар Норак то ҷашни 35-солагии Истиқлолияти давлатӣ корҳои ободонӣ гузаронида мешаванд
Дар Шуғнон корхонаи нави истеҳсоли асфалт ба фаъолият оғоз кард
Китоби «Рустами Эмомалӣ – дастпарвари Мактаби давлатдории Пешвои миллат» роҳнамо барои ҷавонони Тоҷикистон аст
Дар ноҳияи Темурмалик мактаби нав ба истифода дода шуд