Қитъаи «Қизилқалъа-Бохтар»-и роҳи автомобилгарди «Душанбе –Бохтар» ба истифода дода шуд

ДУШАНБЕ, 02.09.2023 /АМИТ «Ховар»/.  1 сентябр қитъаи  «Қизилқалъа –Бохтар»- и роҳи автомобилгарди «Душанбе –Бохтар» мавриди истифода қарор дода шуд. Дар ин хусус ба АМИТ «Ховар» дар Вазорати нақлиёти Ҷумҳурии Тоҷикистон хабар доданд.

Дар маросими он Вазири нақлиёти Ҷумҳурии Тоҷикистон Азим Иброҳим, Раиси вилояти Хатлон Давлаталӣ Саид, Президенти Агентии ҳамкории байналмилалии Ҷопон (JICA) Акихико Танака ва Сафири Ҷопон дар Тоҷикистон Тошихиро Аики иштирок ва суханронӣ намуданд.

Вазири нақлиёт Азим Иброҳим  ва  Раиси вилояти Хатлон Давлаталӣ Саид ба Ҳукумати Ҷопон барои кумак ва дастгирии доимии рушди нақлиёт ва дигар соҳаҳои ҷумҳурии мо  миннатдорӣ баён намуданд. Гуфта шуд, ки Вазорати нақлиёти Ҷумҳурии Тоҷикистон дар заминаи дастуру супоришҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон муносибати хуби ҳамкориро бо шарикони рушд, аз ҷумла бо Ҳукумати Ҷопон ба роҳ мондааст.

Корҳои сохтмонии лоиҳаи таҷдиди қитъаи Қизилқалъа-Бохтар дар роҳи автомобилгарди «Душанбе-Бохтар» моҳи июни соли 2021 оғоз ёфта, моҳи майи соли 2023 пурра ба анҷом расиданд.

Маблағи умумии гранти ҷудошуда аз ҷониби Ҳукумати Ҷопон 3,2 миллиард йени ҷопонӣ (тақрибан 31 миллион доллари амрикоӣ)-ро ташкил медиҳад. Фармоишгари лоиҳа Вазорати нақлиёти Ҷумҳурии Тоҷикистон, машваратчӣ ширкати ҷопонии «CTI Engineering international, Co., Ltd.» ва пудратчии асосӣ ширкати ҷопонии «Dai  Nippon Construction» мебошанд.

Дар татбиқи лоиҳа 30 нафар мутахассиси хориҷӣ ва зиёда аз 200 нафар мутахассисони маҳаллӣ, инчунин техника ва механизмҳои пуриқтидори сохтмонии ҳозиразамон ҷалб гардида буд.

Ёдовар мешавем, ки 24 апрели соли 2023 дар доираи сафари корӣ ба вилояти Хатлон  Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо ҷараёни корҳои сохтмонии лоиҳа шинос шуда, ба сифати корҳои сохтмонӣ ва саҳми мутахассисони ҷопонӣ баҳои баланд доданд ва ба Ҳукумати Ҷопон барои кумакҳои пайваста дар самти дастгирии рушди Тоҷикистон, бахусус дар соҳаҳои инфрасохтор, кишоварзӣ ва тандурустӣ изҳори сипос намуданд.

Роҳи лоиҳавӣ дар заминаи татбиқи ҳадафҳои стратегии Ҳукумати Ҷумҳурии Тоҷикистон, бахусус раҳоӣ бахшидан аз бунбасти коммуникатсионӣ бунёд гардидааст ва ҳадафи асосии Ҳукумати Ҷумҳурии Тоҷикистон бо бунёди чунин роҳҳои  хушсохту замонавӣ беҳтар гардонидани хизматрасонии нақлиётӣ, интиқоли молу маҳсулоти гуногун аз шаҳру ноҳияҳои вилояти Хатлон ба пойтахти мамлакат, фароҳам овардани ҷойҳои нави корӣ дар давраи сохтмон ва беҳтарсозии сатҳу сифати зиндагии аҳолӣ арзёбӣ мешавад.

Президенти JICA Акихико Танака аз ҳамкории Ҷопон бо Вазорати нақлиёти Ҷумҳурии  Тоҷикистон изҳори каноатмандӣ намуда,  аз лоиҳаҳои  дигари Агентии ҳакмкории байналмилалии Ҷопон дар соҳаи роҳу нақлиёти Тоҷикистон ёдовар шуд.

АКС: Вазорати нақлиёти Ҷумҳурии Тоҷикистон