Ҳаҷми умумии истеҳсоли маҳсулоти кишоварзӣ дар Тоҷикистон дар нуҳ моҳ 107,9 фоизро ташкил дод

ДУШАНБЕ, 13.10.2023. /АМИТ «Ховар»/. Давоми нуҳ моҳи соли равон дар ҳамаи шаклҳои хоҷагидории ҷумҳурӣ ҳаҷми умумии маҳсулоти кишоварзӣ ба 43809,5 млн сомонӣ баробар шуд, ки нисбат ба ҳамин давраи соли гузашта 107,9 фоизро ташкил дода, 3192,2 млн сомонӣ зиёд мебошад. Дар ин хусус дирӯз зимни баргузории ҷаласаи ҳайати мушовараи Вазорати кишоварзии Ҷумҳурии Тоҷикистон хабар дода шуд.

Тавре дар Вазорати кишоварзӣ ба АМИТ «Ховар» иттилоъ дода шуд,  ҳаҷми истеҳсоли маҳсулоти растанипарварӣ 33379,0 млн сомонӣ ва маҳсулоти чорвопарварӣ 10430,5 млн сомониро ташкил дода, нисбат ба ҳамин давраи соли гузашта мутаносибан 108,8 ва  105,0 фоиз таъмин шуд. Дар ҳаҷми умумии маҳсулоти кишоварзӣ ҳиссаи хоҷагиҳои ҷамоавӣ ва деҳқонӣ 55,7 фоиз ва  бахши аҳолӣ 44,3 фоизро ташкил медиҳад.

Ҳамзамон ҳаҷми истеҳсоли маҳсулоти растанипарварӣ, асосан истеҳсоли меваҷот, ки нисбат ба ҳамин давраи соли гузашта 41,6 фоиз, полезӣ 21,3 фоиз, сабзавот, 11,3 фоиз, аз ҷумла пиёз 21,5 фоиз ва картошка 3,8 фоиз зиёд аст, афзоиш ёфтааст.

АКС: Маркази матбуот ва иттилооти Вазорати кишоварзии Ҷумҳурии Тоҷикистон