Ҳайати Тоҷикистон дар Марокаш бо намояндагони Хазинаи байналмилалии асъор ва Бонки ҷаҳонӣ вохӯрӣ намуд

ДУШАНБЕ, 12.10.2023 /АМИТ «Ховар»/. 11 октябр дар шаҳри Марокаши Шоҳигарии Марокаш дар ҳошияи ҷаласаҳои солонаи Хазинаи байналмилалии асъор ва Бонки ҷаҳонӣ вохӯриҳои Вазири молияи Ҷумҳурии Тоҷикистон Файзиддин Қаҳҳорзода ва Раиси бонки миллии Тоҷикистон Ҳоким Холиқзода бо Директори департаменти Шарқи Наздик ва Осиёи Миёнаи Хазинаи байналмилалии асъор Ҷиҳад Азур, ноиби Президенти Бонки ҷаҳонӣ оид ба Аврупо ва Осиёи Марказӣ хонум Антонелла Бассани ва муовини Директори иҷроияи Хазинаи байналмилалии асъор Бо Лӣ баргузор гардид. Дар ин хусус ба АМИТ «Ховар» дар Вазорати молияи Ҷумҳурии Тоҷикистон хабар доданд.

Дар вохӯриҳо ҷонибҳо атрофи татбиқи лоиҳаҳои давлатии сармоягузорӣ дар соҳаи энергетика ва дигар соҳаҳои воқеии иқтисодиёт ибрози андеша намуда, оид ба рушду тақвияти бештари ҳамкорӣ дар дигар соҳаҳои мавриди назар изҳори ҳавасмандӣ намуданд.

АКС: Вазорати молияи Ҷумҳурии Тоҷикистон