Дар Душанбе бахшида ба Рӯзи Конститутсияи Тоҷикистон конференсияи ҷумҳуриявии илмӣ –назариявӣ баргузор мешавад

ДУШАНБЕ, 18.10.2023 /АМИТ «Ховар»/. 27 октябр бахшида ба рӯзи қабули Конститутсияи Ҷумҳурии Тоҷикистон Конференсияи ҷумҳуриявии илмӣ-назариявӣ дар мавзӯи «Конститутсияи Ҷумҳурии Тоҷикистон ҳамчун сарчашмаи ислоҳоти ҳуқуқӣ дар Тоҷикистони соҳибистиқлол» баргузор мегардад, хабар медиҳад АМИТ «Ховар».

Конференсия бо ташаббуси Институти фалсафа, сиёсатшиносӣ ва ҳуқуқи ба номи А. Баҳоваддинови Академияи миллии илмҳои Тоҷикистон доир гардида, барои иштирок дар он  олимон, муҳаққиқон, коршиносон, намояндагони вазорату идораҳои давлатӣ, ташкилотҳои ҷамъиятӣ ва муассисаҳои олии илмию таълимӣ, ки бо таҳқиқи мавзӯи конференсия шуғл доранд,  даъват карда мешаванд.

Дар конференсия  дар мавзуъҳои «Конститутсия ҳамчун санади олии ҳуқуқии ҷумҳурӣ», «Конститутсия ҳамчун санади созишӣ ва ҷамъбасти ташаккули қонунгузорӣ», «Конститутсия – заминаи ислоҳоти ҳуқуқӣ дар Тоҷикистони соҳибистиқлол», «Моҳият ва мазмуни ислоҳоти конститутсионӣ дар Тоҷикистон», «Нақши ислоҳоти конститутсионӣ дар таъмини устувории истиқлолияти давлатӣ», «Конститутсияҳои Тоҷикистон: таърих ва имрӯз», «Тағйироту иловаҳои конститутсионии солҳои 1999, 2003, 2016 ва такмили Конститусия дар самти рушди истиқлолияти давлатӣ», «Рушди соҳаҳои конститутсионӣ-ҳуқуқӣ ва маъмурию ҳуқуқӣ дар замони соҳибистиқлолӣ», «Нақши Конститусия дар таҳаввулоти соҳаҳои ҳуқуқи Тоҷикистони мустақил», «Конститутсия ва рушди ҳуқуқи байналмиллалии Ҷумҳурии Тоҷикистон», «Асосҳои конститутсионӣ-ҳуқуқии инкишофи ҷомеаи шаҳрвандӣ дар Тоҷикистон» ва ғайра  маърузаҳо пешниҳод мегарданд.

АКС: АМИТ «Ховар»