Дар Душанбе оид ба аҳамияти ниҳодҳои миллии қавии ҳифзи ҳуқуқи инсон ҳамоиш доир шуд

Октябрь 26, 2023 16:50

ДУШАНБЕ, 26.10.2023. /АМИТ «Ховар»/. Имрӯз дар Душанбе бо ташаббуси мақомоти Ваколатдор оид ба ҳуқуқи инсон дар Ҷумҳурии Тоҷикистон бахшида ба ҷашни 30-солагии Принсипҳои марбута ба ниҳодҳои миллии ҳифзи ҳуқуқи инсон (Принсипҳои Париж)  дар мавзуи «Муҳимияти ниҳодҳои миллии қавии ҳифзи ҳуқуқи инсон: ҷамъбасти натиҷаҳо ва харитаи роҳ барои оянда» ҳамоиш доир гардид. Дар ин хусус мухбири АМИТ «Ховар» хабар медиҳад.

Дар ҳамоиш намояндагони мақомоти давлатӣ, созмонҳои байналмилалӣ ва сохторҳои ҷомеаи шаҳрвандӣ иштирок намуданд.

Ваколатдор оид ба ҳуқуқи инсон дар Ҷумҳурии Тоҷикистон Умед Бобозода иброз намуд, ки дар давраи Истиқлолияти давлатӣ Ҷумҳурии Тоҷикистон аксарияти санадҳои ҳуқуқии байналмилалии ҳуқуқи инсонро тасдиқ намуда, ҷиҳати таъмини риояи ҳуқуқу озодиҳои шаҳрванд дар сатҳи қонунгузории миллӣ ва амалияи ҳуқуқазхудкунӣ тадбирҳои зарурӣ меандешанд. Ба гуфтаи ӯ, яке аз чунин тадбирҳо таъсис додани механизми миллии мустақили ҳифзи ҳуқуқи инсон, яъне мақомоти Ваколатдор оид ба ҳуқуқи инсон дар Ҷумҳурии Тоҷикистон мебошад.

Таъкид гардид, ки мавҷудият ва фаъолияти бемонеаи ниҳодҳои миллии ҳифзи ҳуқуқи инсон яке аз нишонаҳои муҳими давлати демокративу ҳуқуқбунёд мебошад, ки Тоҷикистон маҳз ин роҳро пеш гирифтааст.

Иттилоъ дода шуд, ки Принсипҳои марбут ба мақомоти миллӣ, яъне Принсипҳои Париж бо қатъномаи бевоситаи Ассамблеяи генералии Созмони Милали Муттаҳид аз 20 декабри соли 1993 қабул шудааст. Онҳо нишондиҳандаҳоеро муқаррар менамоянд, ки ниҳодҳои навтаъсис ё мавҷудаи ҳуқуқи башар аз рӯйи онҳо метавонанд аз ҷониби зеркумитаи акредитатсионии кумитаи байналмилалии ҳамоҳангсозӣ ё акредитатсия шаванд. Камбудиҳо ва ё норасоиҳое, ки дар ҷараёни акредитатсия ошкор мегарданд, меавонанд ҳамчун харитаи роҳ ё матритса барои беҳтар гардидани ниҳодҳои миллии ҳуқуқи инсон баъдтар хизмат намоянд. Принсипҳои Париж ҳамчун стандартҳои байналмилалӣ шартҳои ҳадди ақаллро муайян менамоянд ва ниҳодҳои миллии ҳифзи ҳуқуқи инсон бояд ба онҳо ҷавобгӯ бошанд, то ин ки дар байни ниҳодҳои ҳуқуқи инсон, ҳамтоёни худ ва дар низоми СММ эътимод дошта бошанд.

Умед Бобозода изҳор намуд, ки Ваколатдор оид ба ҳуқуқи инсон низ дар доираи ваколате, ки қонунгузории Ҷумҳурии Тоҷикистон ва санадҳои ҳуқуқи байналмилалии аз ҷониби Тоҷикистон эътирофшуда муқаррар менамоянд, ҷиҳати амалисозии сиёсати Ҳукумати ҷумҳурӣ дар соҳаи ҳуқуқу озодиҳои инсон ва шаҳрванд пайваста саъю талош менамояд. Он дар муддати 14 соли фаъолият дар низоми ҳуқуқии давлат мавқеи сазовор пайдо намудааст.

Баён гардид, ки таҳкими иқтидори Ваколатдор оид ба ҳуқуқи инсон яке аз ҷанбаҳои муҳими уҳдадориҳои байналмилалии Ҷумҳурии Тоҷикистон ба ҳисоб меравад. Аз ин лиҳоз дар ин самт пайваста тадбирҳои сиёсӣ-қонунгузорӣ ва амалӣ андешида мешаванд. Ҷумҳурии Тоҷикистон зимни пешниҳоди гузоришҳои миллии худ аз ҷониби сохторҳои дахлдори СММ ҷиҳати таҳким додани фаъолияти ниҳоди миллии ҳуқуқи инсон- Ваколатдор оид ба ҳуқуқи инсон тавсияҳо гирифтааст.

Шаҳлои САДРИДДИН,
АМИТ «Ховар»

АКС: АМИТ «Ховар»

Октябрь 26, 2023 16:50

Хабарҳои дигари ин бахш

То соли 2050 ҳарорати миёнаи ҳаво дар минтақаи Осиёи Марказӣ метавонад аз 0,8 то 6,2 дараҷа баланд гардад
Дар шаҳри Гулистон ҳамоиши ҷавонон баргузор шуд
«ТАСАЛЛО». Барои кӯдакони гирифтори бемории саратон шуъбаи махсус ифтитоҳ гардид
ИММУНИЗАТСИЯ БАР ЗИДДИ ВИРУСИ ПАПИЛЛОМАИ ОДАМ. Он пайдошавии саратони гарданаки бачадонро пешгирӣ менамояд
16 СЕНТЯБР — РӮЗИ БАЙНАЛМИЛАЛИИ ҲИФЗИ ҚАБАТИ ОЗОН. Барои ҳифзи қабати он аз вайроншавӣ Конвенсияи Вена қабул карда шуд
Аз ифлосшавии ҳаво ва таъсири чангу ғубор худро эҳтиёт намоед!
Дар ноҳияи Ҷалолиддини Балхӣ деҳаи нав — «Обшорон» бунёд карда шуд
«БЕҲТАРИН ХИЗМАТЧИИ ДАВЛАТӢ АЗ ҲИСОБИ ЗАНОН». Дар Бадахшон даври вилояти озмуни ҷумҳуриявӣ доир гардид
Озмунҳои ҷумҳуриявӣ завқи кадбонугӣ ва анъанаҳои хӯрокпазии миллиро эҳё менамоянд
Саридораи бойгонӣ ҳамчун ниҳоди муҳими давлатӣ дар Тоҷикистон мавқеи назаррас дорад
Дар Душанбе масъалаҳои пешбурди ҳифзи ҳуқуқи инсон баррасӣ шуданд
Рушди соҳаи гастроэнтерология ва гепатология баррасӣ гардид