Доир ба татбиқи Барномаи паст намудани сатҳи шуғли бақайдгирифтанашуда (ғайрирасмӣ) аз ҷониби вазорату идораҳои масъул корҳои назаррас ба иҷро расидаанд

ДУШАНБЕ, 26.10.2023 /АМИТ «Ховар»/.  25 октябр бо иштироки муовини Сарвазири Ҷумҳурии Тоҷикистон Матлубахон Сатториён дар Вазорати меҳнат, муҳоҷират ва шуғли аҳолии Ҷумҳурии Тоҷикистон ҷаласаи навбатии Кумитаи ҷумҳуриявии ҳамоҳангсозии мусоидат ба шуғли аҳолӣ баргузор гардид. Дар ин хусус АМИТ «Ховар» бо истинод ба ин вазорат хабар медиҳад.

Дар кори ҷаласа раванди татбиқи Барномаи паст намудани сатҳи шуғли бақайдгирифтанашуда (ғайрирасмӣ) дар Ҷумҳурии Тоҷикистон барои солҳои 2019-2023, ки бо қарори Ҳукумати Ҷумҳурии Тоҷикистон аз 30 августи соли 2019 тасдиқ шудааст, мавриди баррасӣ қарор дода шуд.

Бояд гуфт, ки ин барнома барои амалисозии сиёсати босамари давлатӣ дар самти ба шуғли расмӣ ҷалб намудани аҳолии қобили меҳнат, таъмин намудани кафолатҳои давлатии иҷтимоии кормандон, баҳисобгирии дақиқи қувваи корӣ, ғанӣ гардонидани буҷети суғуртаи иҷтимоӣ ва дар ин замина баланд бардоштани сатҳи ҳифзи иҷтимоӣ ва зиндагии аҳолии Тоҷикистон аҳамияти хеле муҳим дорад.

Дар маҷмуъ, барнома аз панҷ ҳадафи асосӣ- таҳкими заминаи меъёрии ҳуқуқии танзими муносибатҳои меҳнатӣ, тарҳрезӣ ва амалӣ намудани тадбирҳо ҷиҳати баланд бардоштани сатҳи тахассусии қувваи корӣ, амалӣ намудани тадбирҳо оид ба ташвиқ ва тарғиб намудани афзалияти шуғли расмӣ нисбат ба шуғли ғайрирасмӣ, пешгирии ҳолатҳои машғул шудани кормандон ва корфармоён ба шуғли ғайрирасмӣ дар соҳаҳои иқтисодиёт, таҳким бахшидан ба фаъолияти байниидоравӣ дар самти паст намудани сатҳи шуғли бақайдгирифтанашуда (ғайрирасмӣ) дар соҳаҳои иқтисодиёт ва мунтазам арзёбӣ намудани вазъи бозори меҳнат ва шуғли аҳолӣ, таҳқиқи қувваи корӣ, тарҳрезӣ ва амалӣ намудани механизмҳои таъсирбахш барои пасткунии сатҳи шуғли бақайдгирифтанашуда (ғайрирасмӣ) дар соҳаҳои иқтисодиёт иборат мебошад.

Таҳлили ҷараёни иҷрои барнома дар давраи татбиқи он нишон медиҳад, ки вобаста ба ҳадафҳои барнома корҳои назаррас аз ҷониби вазорату идораҳои масъул ба иҷро расидаанд.

Дар давраи амалисозии барнома ҷиҳати танзим намудани муносибатҳои меҳнатӣ ва таъмини кафолатҳои давлатии иҷтимоии кормандон дар заминаи Кодекси меҳнати Ҷумҳурии Тоҷикистон аз ҷониби Вазорати меҳнат, муҳоҷират ва шуғли аҳолии Ҷумҳурии Тоҷикистон 12 санади меъёрии ҳуқуқӣ таҳия гардида, аз ҷониби Ҳукумати Ҷумҳурии Тоҷикистон  ба тасвиб расиданд.

Дар ҷаласа таъкид шуд,  ки дар давраи татбиқи барнома дар миқёси ҷумҳурӣ инчунин 1787 корхонаву коргоҳи нави истеҳсолӣ бо 18,2 ҳазор ҷойи корӣ таъсис дода шуд, ки барои бо ҷойи кор таъмин намудани аҳолии мамлакат нақши муҳим доранд ва дар ин ҷода Вазорати саноат ва технологияҳои нави Ҷумҳурии Тоҷикистон саҳми арзанда дорад. Дар баробари ин, давоми солҳои 2019-2023 аз ҳисоби ҳама сарчашмаҳо дар миқёси ҷумҳурӣ 833,1 ҳазор ҷойҳои нави корӣ таъсис дода шуд, ки аз ин шумора 327,0 ҳазор (39,2 фоиз) ҷойи кори доимӣ мебошанд.

Дар ҳамин давра дар бахши воқеии иқтисодиёт 462,7 ҳазор (55,5 фоиз) ва дар бахши хизматрасонӣ 349,1 ҳазор ҷойҳои нави корӣ таъсис дода шудааст.

Дар натиҷаи таъсис додани корхонаву коргоҳҳои нави истеҳсолӣ ва таъсис додани ҷойҳои нави корӣ дар соҳаҳои иқтисодиёти мамлакат давоми солҳои 2019-2023 шумораи аҳолии машғули кор дар ҷумҳурӣ аз 2463,4 ҳазор нафар то ба 2608,4 ҳазор нафар ё 5,9 фоиз афзоиш ёфтааст, ки ба ҳисоби миёна дар як сол қариб то 2 фоизро ташкил дода, ба суръати миёнаи солонаи рушди аҳолии мамлакат  (2,0 -2,2 фоиз) наздик мебошад.

Сатҳи бекории расмӣ дар ҷумҳурӣ то ба 1,9 фоиз кам шуд. Нишондиҳандаҳои ба даст оварда аз ноилшавӣ ба ҳадафҳои барнома шаҳодат медиҳанд.

Вазорати меҳнат, муҳоҷират ва шуғли аҳолии Ҷумҳурии Тоҷикистон минбаъд низ кӯшиш ба харҷ медиҳад, ки бо тақвияти ҳамоҳангии фаъолияти комиссияи сетарафа ва бо истифода аз ҳама имконияти мавҷуда, татбиқи Барнома оид ба паст намудани сатҳи шуғли бақайдгирифтанашуда (ғайрирасмӣ) дар Ҷумҳурии Тоҷикистон барои солҳои 2019-2023-ро сари вақт ва босифат таъмин намояд.

София ШОИК,
АМИТ «Ховар»

АКС: Вазорати меҳнат, муҳоҷират ва шуғли аҳолии Ҷумҳурии Тоҷикистон