Дурнамои ҳамкорӣ байни минтақаҳои Тоҷикистон ва кишвари Красноярск баррасӣ гардид

ДУШАНБЕ, 20.10.2023 /АМИТ «Ховар»/. 19 октябр консули генералии Ҷумҳурии Тоҷикистон дар шаҳри Новосибирски Федератсияи Русия Наҷмиддин Имомзода дар шаҳри Красноярск бо губернатори кишвари Красноярск Михаил Котюков мулоқот намуд. Дар ин хусус ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

Зимни вохӯрӣ ҳолати кунунӣ ва дурнамои ҳамкорӣ байни минтақаҳои Тоҷикистон ва кишвари Красноярск мавриди баррасӣ қарор гирифт.

Зарурати густариши ҳамкорӣ дар соҳаҳои сайёҳӣ, ҷалби сармоя, инчунин тавсеаи робитаҳои иқтисодӣ-тиҷоратӣ ва дигар масоили мавриди таваҷҷуҳи тарафайн таъкид шуд.

Ба манзури густариши равобити тиҷорӣ ва иқтисодӣ консули генералӣ пешниҳод намуд, то миёни доираҳои тиҷоратии Тоҷикистон ва кишвари Красноярск вохӯриҳо танзим шуда, барои иштирок дар намоишгоҳҳо ва анҷуманҳои мухталифи байналмилалӣ мусоидат  шавад.

АКС: Вазорати корҳои хориҷии Ҷумҳурии Тоҷикистон