ФУТБОЛ. Дастаи мунтахаби Тоҷикистон дар финали мусобиқаи «Ҷоми Мердека-2023» дар Малайзия бозӣ менамояд

ДУШАНБЕ, 11.10.2023 /АМИТ «Ховар»/. 10 октябр  дар доираи омодагӣ ба мусобиқаи «Ҷоми Mердека-2023» дастаи мунтахаби Тоҷикистон  оид ба футбол  таҳти роҳбарии Петр Сегрт дар Малайзия нахустин тамринҳои худро анҷом дод. Дар ин хусус шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.

Аз 23 бозингаре, ки барои иштирок дар ин мусобиқот даъват шудаанд, 18 нафарашон ҳоло дар ҳайати дастаи мунтахаби Тоҷикистон  ҳастанд.

Имрӯз, 11 октябр дастаи мунтахаби Тоҷикистон пурра ҷамъ мешавад. Кумитаи тадорукоти мусобиқаи «Ҷоми Мердека-2023» ба қолаби мусобиқа тағйирот ворид намуд. Қарор буд, ки  дар даври нимниҳоии мусобиқот дастаи мунтахаби Фаластин 13 октябр бо  дастаи мунтахаби  Тоҷикистон бозӣ намояд,  вале  дастаи мунтахаби Фаластин  дар ин мусобиқот иштирок наменамояд.

Ба ин тартиб, дастаи  мунтахаби Тоҷикистон пеш аз муҳлат ба финали «Ҷоми Мердека-2023» роҳ ёфта, 17 октябр дар Варзишгоҳи миллии Букит Ҷалили Куала-Лумпур бо ғолиби даври нимниҳоӣ байни дастаҳои мунтахаби Малайзия – Ҳиндустон рақобат менамояд.

 Мусобиқаи байналмиллалии «Ҷоми Мердека-2023»

Даври ½-ниҳоӣ

13 октябр (ҷумъа)

18:00 –Малайзия –Ҳиндустон

Финал

17 октябр (сешанбе)

18:00 – Ғолиби ҷуфти Малайзия/  Ҳиндустон –ТОҶИКИСТОН 

Эзоҳ: оғози бозӣ ба вақти Душанбе аст.

АКС: Федератсияи футболи Тоҷикистон