«ОБ БАРОИ ОЯНДАИ МО». Дар Душанбе таҳти ин унвон Фестивали ҷавонони пойтахт баргузор шуд

Октябрь 27, 2023 11:33

ДУШАНБЕ, 27.10.2023 /АМИТ «Ховар»/.  25 октябр дар Боғи фарҳангу фароғатии ба номи Умари Хайёми пойтахт бо ташаб­буси Кумитаи иҷроияи Ҳизби Халқии Демократии Тоҷикистон дар шаҳри Душанбе Фестивали ҷавонони пойтахт таҳти унвони «Об — барои ояндаи мо» баргузор гардид.  Дар ин хусус АМИТ «Ховар» бо истинод ба Кумитаи иҷроия хабар медиҳад.

Меҳмонони фестивал Осорхонаи Пешвои миллат муҳтарам Эмомалӣ Раҳмонро, ки дар шаҳраки донишҷӯёни Донишгоҳи миллии Тоҷикистон воқеъ гардидааст, тамошо намуда, сипас дар Конференсияи илмӣ-назариявӣ таҳти унвони «Тоҷикистон — ташаббускори масоили об дар сатҳи ҷаҳонӣ» иштирок  намуданд.

Дар фестивал иброз гардид,  ки мақсад аз баргузории он, пеш аз ҳама, таблиғу ташвиқи ҳамаҷонибаи ташаббусҳои ҷаҳонии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси муаззами ҲХДТ муҳтарам Эмомалӣ Раҳмон дар соҳаи обу иқлим мебошад.

Гуфта шуд, ки таърихи даврони навини давлатдории тоҷикон таҳти роҳбарии муҳтарам Эмомалӣ Раҳмон гувоҳ аст, ки ташаббусҳои Асосгузори сулҳу ваҳдати миллӣ – Пешвои миллат, Президенти Тоҷикистон, Раиси муаззами ҲХДТ муҳтарам Эмомалӣ Раҳмон дар соҳаи об, пеш аз ҳама, ба таҳкими ҳамкорӣ ва танзими муносибатҳо дар ин соҳаи ҳаётан муҳим равона гардида, барои ноил шудан ба ҳадафҳои рушди устувор заминаи пойдор мегузоранд.

Воқеан ҳам мушкилоти таъмини об барои аҳолии кураи Замин сол ба сол зиёд мегардад. Зеро айни ҳол тибқи маълумоти оморӣ, қариб 1 млрд одам дар дунё ба оби тозаи ошомиданӣ ва 2,6 млрд нафар ба шароити одитарини санитарӣ дастрасӣ надоранд. Зиёда аз 80 давлат норасоии захираҳои обро эҳсос менамоянд, ҳар ҳафта 42 ҳазор нафар аз бемориҳое, ки ба сифати пасти оби ошомиданӣ ва шароити ғайрисанитарӣ вобастаанд, мефавтанд, ки бештар аз 90 фоизи онҳо кӯдакони то 5-сола мебошанд. Хушксолӣ ва биёбоншавӣ ба манбаи воситаҳои зиндамонии зиёда аз 1,2 млрд нафар мардуми дунё таҳдид менамояд. Аз ин хотир, ташаббусҳои ҷониби Тоҷикистон на танҳо аҳамияти минтақавӣ, балки байналмилалӣ касб намудаанд.

Дар идомаи фестивал дар мавзуъҳои «Ташаббусҳои ҷаҳонии Тоҷикис­тон дар соҳаи обу иқлим» ва «Тоҷикистон — пешоҳанги масоили ҳифзи пиряхҳо дар ҷаҳон» маърузаҳо пешкаш гардиданд.

Пас аз анҷоми конференсия, ки дар ҳошияи Фестивали ҷавонони пойтахт таҳти унвони «Об барои ояндаи мо» доир шуд, меҳмонон Боғи фарҳангию фароғатии ба номи Умари Хайём, намоишгоҳи масоили обу иқлим ва ҳифзи пиряхҳоро аз наздик тамошо намуда, дар мусобиқаҳои варзишӣ аз рӯйи намудҳои футболи хурд, волейбол, бокс, чавгонбозӣ, гимнастикаи бадеӣ иштирок намуданд. Ҳамчунин онҳо дар раванди тамринҳои варзишӣ, озмунҳои «Рассоми беҳтарин» ва «Иншои беҳтарин» иштирок намуданд.

Сипас маросими ҷоизасупорӣ ба ғолибони якчанд озмун баргузор ва ба ғолибони бахшҳои фестивал аз ҷониби Кумитаи тадорукот Диплом, Сипоснома, Ифтихорномаи ҳизбӣ ва туҳфаҳои хотиравӣ супорида шуданд.

Дар фарҷом барномаи рангини фарҳангӣ баргузор гардид.

АКС: Кумитаи иҷроияи Ҳизби Халқии Демократии Тоҷикистон дар шаҳри Душанбе

Октябрь 27, 2023 11:33

Хабарҳои дигари ин бахш

ТОҶИКИСТОН ДАР САРХАТИ ТАШАББУСҲОИ ҶАҲОНӢ. Андешаҳо дар мавриди қабули қатъномаи таърихии Тоҷикистон оид ба зеҳни сунъӣ дар Маҷмаи Умумии СММ
14-16 октябри соли 2025 дар шаҳри Душанбе Форуми байналмилалии сармоягузории «Dushanbe Invest-2025» баргузор мешавад
Дар Бадахшон оид ба ташаббусҳои ҷаҳонии Президенти Тоҷикистон ҳамоиши ҷумҳуриявӣ доир шуд
Мушоҳидаи аэровизуалӣ ва георадарии ҳолати пиряхҳо ва кӯлҳои кӯҳии Тоҷикистон гузаронида шуд
Дар Ню-Йорк масъалаи омодагӣ ба Конфронси оби СММ-2028 дар Душанбе баррасӣ гардид
Президенти Тоҷикистон: «Таъсиси Маркази минтақавии зеҳни сунъиро дар шаҳри Душанбе салоҳи кор мешуморем»
Пиряхҳо ва дигар манбаъҳои обии Тоҷикистон то 60 фоизи захираҳои оби Осиёи Марказиро ташкил медиҳанд
Дар Ню-Йорк аз ташаббусҳои ҷаҳонии Тоҷикистон дар соҳаи захираҳои об ва тағйирёбии иқлим ёдовар шуданд
Бо пешниҳоди Тоҷикистон 14 қатъномаи Маҷмаи Умумии СММ оид ба масъалаҳои обу иқлим қабул гардид
Тоҷикистон дар Ню-Йорк ҷаласаи махсуси сатҳи баланд баргузор намуд
Санадҳои ниҳоии Конфронси байналмилалии сатҳи баланд оид ба ҳифзи пиряхҳо интишор гардиданд
Бо ташаббуси Тоҷикистон Қатъномаи нави СММ оид ба ҳамкорӣ бо ИДМ қабул гардид