ОБОДОНӢ ДАР МАҲАЛ. Сокинони деҳаи Хайрободи Ҷамоати деҳоти Работ 1,5 км роҳи байнидеҳавиро бетонпӯш менамоянд

ДУШАНБЕ, 31.10.2023. /АМИТ «Ховар»/. Бо мақсади истиқболи сазовори 35-солагии Истиқлолияти давлатии Ҷумҳурии Тоҷикистон сокинони деҳаи Хайрободи Ҷамоати деҳоти Работи шаҳри Турсунзода  барои бетонпӯшкунии 1,5 км роҳи байнидеҳавӣ ба ҳашарӣ умумӣ баромада, дар ободии маҳали зист саҳм мегузоранд. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Турсунзода хабар доданд.

Дар ин кори хайр саҳми соҳибкорони маҳаллӣ ва ҷавонони ватандӯсти деҳа калон буда, онҳо иқдом гирифтаанд, ки дар оянда 1 км  роҳи дорои аҳамияти маҳаллиро аз маркази ҷамоат то деҳа  асфалтпӯш намоянд.

Тавре дар мақомоти шаҳри Турсунзода иттилоъ доданд ҷараёни корҳои бетонпӯшкунии роҳ дар сатҳи зарурӣ қарор дошта, ин гуна иқдоми ташаббускорона  шоистаи таҳсин мебошад.

Дар дигар деҳаҳои ҷамоат низ корҳои ободониву созандагӣ, асфалтпӯш ва бетонпӯш намудани роҳҳо бомаром идома доранд.

АКС: Мақомоти иҷроияи ҳокимияти давлатии шаҳри Турсунзода