«РОҒУН» — БИНОИ ВАҲДАТУ ҲАМБАСТАГИИ МОСТ. Ҳайати мақомоти иҷроияи ҳокимияти давлатии шаҳри Турсунзода ба мавзеи сохтмони НБО «Роғун» сафар намуд

ДУШАНБЕ, 21.10.2023. /АМИТ «Ховар»/. Намояндагони Мақомоти иҷроияи ҳокимияти давлатии шаҳри Турсунзода ва Кумитаи иҷроияи Ҳизби Халқии Демократии Тоҷикистон дар шаҳри Турсунзода бо роҳбарии раиси шаҳр Парвиз Акрамзода дар ҳайати 110 нафар барои шиносоӣ бо рафти корҳои сохтумонӣ дар иншооти Неругоҳи барқи обии «Роғун» ба ин майдони меҳнат ва арсаи нангу номуси миллӣ сафар намуданд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Турсунзода иттилоъ медиҳад.

Дар номаи қаблан ирсолгаштаи онҳо иброз гардидааст, ки бунёди иншооти бузурги аср илова ба манфиатҳои иқтисодӣ ба ҳар шаҳрванди худшиносу ватандӯсти ҷумҳурӣ руҳу илҳоми тоза бахшида, эътимоди мардумро ба ояндаи дурахшони мамлакат боз ҳам қавитар мегардонад.

Намояндагони Мақомоти иҷроияи ҳокимияти давлатии шаҳри Турсунзода ва Ҳизби Халқии Демократии Тоҷикистон дар шаҳри Турсунзода зимни боздид аз иншооти асосии неругоҳ, нақби сохтмони қабати чаҳорум, ядрои сарбанди асосӣ, обқабулкунакҳои доимӣ, нақбҳои нақлиётию обрасон, шахтаҳои ҳаводеҳ, толори мошинҳо ва ғайра бо заҳмату мардонагии бунёдгарони Кохи нури Тоҷикистон аз наздик шинос шуданд.

Ҳангоми танаффуси нисфирӯзӣ барои бунёдгарони НБО «Роғун» ҷониби Мақомоти иҷроияи ҳокимияти давлатии шаҳри Турсунзода хӯроки нисфирӯзӣ ташкил карда шуд . Санъаткорону ҳунарпешагони шаҳр дар доираи ин танаффус барномаи фарҳангӣ манзур намуданд.

АКС: Мақомоти иҷроияи ҳокимияти давлатии шаҳри Турсунзода