Ҳайати Тоҷикистон дар форуми минтақавӣ — ҷаласаи роҳбарони Кумитаҳои ҳолатҳои фавқулодаи давлатҳои Осиёи Марказӣ иштирок дорад

ДУШАНБЕ, 10.11.2023 /АМИТ «Ховар»/. 10 ноябр дар шаҳри Алматои Ҷумҳурии Қазоқистон форуми минтақавӣ — ҷаласаи роҳбарони кумитаҳои ҳолатҳои фавқулодаи давлатҳои Осиёи Марказӣ ба кор оғоз намуд, ки дар он ҳайати Ҷумҳурии Тоҷикистон таҳти роҳбарии  Раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Рустам Назарзода иштирок дорад. Дар ин хусус АМИТ «Ховар» бо истинод ба Кумитаи ҳолатҳои фавқулода ва мудофиаи гражданӣ хабар медиҳад.

Дар ҷараёни мулоқот якчанд лоиҳаҳо ҷиҳати таҳкими ҳамкории минтақавии давлатҳои Осиёи Марказӣ дар самти коҳиши хатари офатҳои табиӣ, пешгирӣ ва вокуниш ба ҳолатҳои фавқулода баррасӣ мешаванд.

Дар поёни ҷаласа қабули санади ниҳоии форуми минтақавӣ — ҷаласаи роҳбарони вазоратҳои ҳолатҳои фавқулодаи давлатҳои Осиёи Марказӣ дар назар аст.

Дар нишаст раҳбарони бахшҳои наҷоти давлатҳои Осиёи Марказӣ ва созмонҳои байналмилалӣ иштирок доранд.

АКС: Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон