Дар Ҷамоати деҳоти Ориёни шаҳри Ҳисор ду бинои иловагии муассисаи таҳсилоти миёнаи умумӣ ифтитоҳ ёфт

Ноябрь 29, 2023 14:07

ДУШАНБЕ, 29.11.2023. /АМИТ «Ховар»/. Дар деҳаҳои Чинор ва Ҳалқарӯди Ҷамоати деҳоти Ориёни шаҳри Ҳисор ду бинои иловагии мактабҳо дар назди муассисаҳои таҳсилоти миёнаи умумии рақамҳои 61 ва 65  ифтитоҳ ёфт. Дар ин хусус ба АМИТ «Ховар» дар Мақомоти иҷроияи ҳокимияти давлатии шаҳри Ҳисор хабар доданд.

Биноҳои мактабҳо дар доираи лоиҳаи CASA-1000 бунёд ёфта, дар  маросими ифтитоҳи онҳо Раиси шаҳри Ҳисор, кормандони дастгоҳи ҷамоат, намояндагони лоиҳа ва бунёди миллии маблағгузории иҷтимоии Тоҷикистон, пудратчии сохтмон – ҶДММ «Нури Неъмат», пиру барнои деҳа ва устодону шогирдони муассисаҳо иштирок намуданд.

Раиси шаҳр сокинони деҳаҳои Чинор ва Ҳалқаруд, устодону шогирдони муассисаҳои таҳсилотии рақамҳои 61 ва 65-ро бо ин рӯйдоди муҳим муборакбод гуфта, аз номи мақомоти иҷроияи ҳокимияти давлатии шаҳр ва сокинон ба сарпарастони Лоиҳа,  Ҳукумати Ҷумҳурии Тоҷикистон, бахусус Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон изҳори сипос намуд.

Мавриди ёдоварӣ аст, ки «САSА-1000» бузургтарин лоиҳаи энергетикӣ дар ҷаҳон маҳсуб мешавад, ки дар ҷумҳуриҳои Осиёи Марказӣ ва Осиёи Ҷанубӣ – Қирғизистон, Тоҷикистон, Афғонистон ва Покистон амалӣ мегардад. Дар доираи ин лоиҳа созишномаҳои мухталиф ба имзо расидаанд, ки иловатан дар марзҳои чор давлате, ки хати интиқоли барқи САSA-1000 аз он мегузарад, амалӣ мешаванд.

Масъулони лоиҳа ба мушкилии сокинони Ҷамоати деҳоти Ориён расидагӣ намуда, дар деҳаи Ҳалқарӯд, ки қариб 2400 нафар аҳолӣ зиндагӣ менамояд ва дар деҳаи Чинор, ки зиёда аз 2400 нафар аҳолӣ сукунат доранд, дар ду ошёна 7 синфхона бо 336 ҷойи нишаст ва 2 утоқи корӣ барои омӯзгорон бунёд намуданд.

Маблағи умумии сохтмони ду бинои иловагии мактабҳо беш аз 4,5 миллион сомониро ташкил медиҳад.

Раиси шаҳр ва намояндагони Лоиҳа бо устодону шогирдони муассисаҳо суҳбат намуданд ва изҳори итминон доштанд, ки омӯзгорону хонандагони муассисаҳо ба қадри ғамхориҳои Пешвои миллат мерасанд, ба таҷҳизоту воситаҳои аёнӣ назари ғамхорона зоҳир ва аз онҳо самаранок истифода менамоянд ва бо баҳои хубу аъло таҳсил намуда, соҳибкасбу соҳибилм мегарданд ва оянда ба миллату давлати хеш содиқона хизмат менамоянд.

АКС: Мақомоти иҷроияи ҳокимияти давлатии шаҳри Ҳисор

Ноябрь 29, 2023 14:07

Хабарҳои дигари ин бахш

ДОНИШ — ПОЯИ МУҲИМТАРИНИ РУШДИ ДАВЛАТ ВА МИЛЛАТ. Эҳдо ба Рӯзи дониш
Дар назди 20 муассисаи таълимӣ биноҳои иловагӣ бо озмоишгоҳҳои замонавӣ сохта мешаванд
Доир ба амалисозии барномаҳои давлатии марбут ба таҳсилоти томактабӣ ҷаласаи корӣ баргузор гардид
Дар Донишгоҳи техникии Тоҷикистон Чемпионати ҷаҳонии касбӣ баргузор гардид
Дар Душанбе Озмуни ҷумҳуриявии «Барномасози ҷавон» баргузор шуд
Дар назди муассисаҳои таълимии ноҳияи Рашт синфхонаҳои иловагӣ ба истифода дода шуданд
Дар Душанбе даври сеюми Озмуни ҷумҳуриявии «Фурӯғи субҳи доноӣ китоб аст» ҷамъбаст гардид
Аз аввали соли таҳсил маоши вазифавии кормандони соҳаи маориф 30 фоиз зиёд карда мешавад
Ба соҳаи маорифи вилояти Суғд Сертификат дар ҳаҷми 3,3 миллион сомонӣ тақдим карда шуд
Дар Сингапур ҳамоиши байналмилалӣ оид ба соҳаи маориф баргузор шуд
Ба тамоми шуъбаҳои маорифи Тоҷикистон беш аз 9 миллион китоби дарсӣ ва маводи таълимӣ дастрас карда мешавад
НАВГОНӢ ДАР СОЛИ НАВИ ТАҲСИЛ. Дар Тоҷикистон ба дониш ва малакаи хонандагон дар сатҳи 10 хол баҳо гузошта мешавад