Дар қисмҳои низомии шаҳри Хоруғ наваскарон савганди садоқат ёд намуданд

Ноябрь 18, 2023 14:51

ХОРУҒ, 18.11.2023 /АМИТ «Ховар»/. Наваскарони Қӯшунҳои сарҳадии Кумитаи давлатии амнияти миллии Ҷумҳурии Тоҷикистон пас аз як моҳи таълиму омӯзиш савганди ҳарбӣ ёд намуда, садоқати худро нисбат ба Ватан ва Президенти Ҷумҳурии Тоҷикистон изҳор доштанд. Дар ин хусус хабарнигори минтақавии АМИТ «Ховар» Файз Мирасан хабар медиҳад.

Марзбонони навдаъват пас аз як моҳи омӯзиш дар Маркази таълимии ғайрибастӣ қасам ёд намуданд, ки ба Ватани худ ҷонфидоёна хизмат менамоянд ва то охир ба ин қасами худ содиқ мемонанд. Ҳар ҷавоне, ки ба хизмати Ватан-Модар камар мебандад, то охири умр ин лаҳзаи ҳаёташро фаромӯш намесозад ва ҳамеша аз ин рӯзҳои пур аз шодиву фараҳ ва мураккабу душвор бо хушҳолӣ ёд менамояд.

Роҳбарияти шаҳри Хоруғ афсарону марзбонони мамлакатро бо Рӯзи савгандёдкунӣ табрик намуда, изҳор доштанд, ки дар ҳар мулоқоти худ бо низомиён Президенти Ҷумҳурии Тоҷикистон таъкид медоранд, ки Ҳукумати мамлакат бо назардошти аҳамияти калидӣ ба омода намудани мутахассисони баландихтисоси ҳарбӣ, аз ҷумла барои сохторҳои марзбонӣ эътибори аввалиндараҷа медиҳад. Дар даҳ соли охир садҳо нафар ҷавонон Донишкадаи олии сарҳадии Кумитаи давлатии амнияти миллии Тоҷикистон ва даҳҳо тани дигар муассисаҳои таҳсилоти олии мамлакатҳои хориҷиро хатм намуда, имрӯз дар Қӯшунҳои сарҳадӣ хизмат менамоянд.

Дар дохили қисми сарҳадбонии Маркази таълимии ғайриштатӣ наваскарон қабл аз ба марз раҳсипор гардидан дар ин ҷо бо тамоми нозукиҳои ҳифзи сарҳад ба таври назариявию амалӣ шинос шуда, пас аз як моҳи таълиму тадрис ва маъракаи қасамёдкунӣ ҳаққи ҳифзи марзи давлатиро пайдо менамоянд.


Дар маросими савгандёдкунӣ як гурӯҳ волидон иштирок намуданд. Онҳо ифтихор доштанд, ки фарзандонашон дар баробари дигар ҷавонони бонангу номус имрӯз барои ҳимояи марзу буми ҷумҳурӣ омода шудаанд.

Яке аз волидоне, ки роҳи дарозро тай намуда, дар рӯзи савганди писараш иштирок намуд, сокини шаҳри Душанбе Хушқадам Қудратов мебошад. Дар суҳбат бо марзбонон ӯ изҳор дошт, ки «ин писари сеюми ман аст, ки дар сафи неруҳои мусаллаҳи Тоҷикистон хизмат менамояд. Ман ифтихормандам, ки фарзанди ман либоси ҳарбӣ ба бар намуда, марзи ҷумҳуриро ҳимоят менамояд».

Сарбозони шуҷоъ дар назди фармондеҳон, ҳамяроқону волидони худ қасам ёд намуданд, ки сарфи назар аз ҳар гуна монеаву душвориҳо ба савганди хеш содиқ мемонанд ва дар ҳифзи марзу буми ҷумҳурӣ ҳаёти худро низ дареғ намедоранд.

АКС: АМИТ «Ховар»

Ноябрь 18, 2023 14:51

Хабарҳои дигари ин бахш

МАВСИМИ ЗУКОМ. Ҳангоми беморӣ бахудтабобаткунӣ машғул нашавед!
10 ДЕКАБР – РӮЗИ ҲУҚУҚИ ИНСОН. Ба қабули Эъломияи умумии ҳуқуқи башар 75 сол пур шуд
Байни Тоҷикистон ва Қазоқистон 5 хатсайри байналмилалии нақлиёти мусофирбарӣ фаъолият дорад
Байни Тоҷикистон ва Латвия оид ба рушди ҳамкорӣ дар соҳаи нақлиёт ва авиатсияи гражданӣ Ёддошти тафоҳум ба имзо расид
Дар Душанбе татбиқи «Стратегияи миллии рушди маорифи Ҷумҳурии Тоҷикистон барои давраи то соли 2030» баррасӣ гардид
ҚОНУНИ ҶУМҲУРИИ ТОҶИКИСТОН «ДАР БОРАИ ТАНЗИМИ АНЪАНА ВА ҶАШНУ МАРОСИМ». Дар Донишгоҳи миллӣ натиҷаи амали онро баррасӣ намуданд
Дар Тоҷикистон беш аз 20 санади меъёрии ҳуқуқие, ки асосҳои мухталифи муқовимат ба коррупсияро муқаррар менамоянд, қабул шудаанд
Дар Душанбе даври навбатии машваратҳои сиёсии Тоҷикистону Швейтсария баргузор шуд
Ҳайати Тоҷикистон дар ҷаласаи Шурои Иттиҳоди Давлатҳои Мустақил дар Москва иштирок намуд
Директори Агентии назорати давлатии молиявӣ ва мубориза бо коррупсия Сулаймон Султонзода: «Мубориза бар зидди коррупсия вазифаи асосии мақомоти давлатӣ, ниҳодҳои ҷомеаи шаҳрвандӣ ва ҳар як сокини мамлакат мебошад»
ИМРӮЗ-РӮЗИ ГЕОЛОГҲОИ ТОҶИКИСТОН. Дар ҷаҳони муосир сарватҳои зеризаминӣ қудрату тавоноии давлатро муайян менамоянд
Ёдгории таърихию фарҳангии Қалъаи Ҳисор дили меҳмонони чиниро тасхир намуд