СУРАТГУЗОРИШИ АМИТ «Ховар». Президенти Озарбойҷон дар намоишгоҳи давлатҳои СПЕКА бо маҳсулоти ғурфаи Тоҷикистон шинос шуд

ДУШАНБЕ, 23.11.2023. /АМИТ «Ховар»/. 22 ноябр дар шаҳри Бокуи Озарбойҷон «Намоишгоҳи давлатҳои СПЕКА*: ҳамкории минтақавӣ барои рушди устувор» ифтитоҳ шуд. Дар намоишгоҳ ғурфаи Ҷумҳурии Тоҷикистон ташкил гардид, иттилоъ медиҳад хабарнигори АМИТ «Ховар».

Дар доираи маросими ифтитоҳи намоишгоҳ Президенти Ҷумҳурии Озарбойҷон Илҳом Алиев бо маҳсулоти истеҳсоли ватании Тоҷикистон, ки дар ғурфаи мамлакат ба намоиш гузошта шудаанд, шинос гардид.

Қобили тазаккур аст, ки намоишгоҳ ба муносибати 25-солагии таъсиси СПЕКА* ташкил шудааст. Ҳадаф аз баргузории намоишгоҳ намоиши иқтидори иқтисодии давлатҳои аъзо, баррасии муштараки имконоти шарикии мутақобилан судманд ва таҳкими ҳамкории иқтисодии минтақавӣ байни давлатҳо мебошад.

Дар анҷоми намоишгоҳ баргузории форуми тиҷоратии соҳибкорон дар назар аст.

АКС: АМИТ «Ховар»

———

* СПЕКА — Барномаи махсуси СММ барои иқтисодиёти Осиёи Марказӣ, Озарбойҷон ва Афғонистон